കോതമംഗലം: നേര്യമംഗലത്ത് പട്ടയം ലഭിച്ച ആദിവാസി കുടുംബങ്ങള്‍ക്ക് അടിസ്ഥാന സൗകര്യങ്ങള്‍ ഒരുക്കണമെന്ന് ആവശ്യം. ഇതിനോടകം താമസമാക്കിയ കുടുംബങ്ങള്‍ക്ക് ഒരുക്കേണ്ട സൗകര്യങ്ങള്‍ ചര്‍ച്ച ചെയ്യാന്‍ ചേര്‍ന്ന ഊരുകൂട്ടത്തിലാണ് നിര്‍ദേശം.
ജില്ലാ കൃഷിതോട്ടം കയ്യേറി താമസമാക്കിയ നൂറിലേറെ കുടുംബങ്ങള്‍ക്ക് ഈ വര്‍ഷം ആദ്യമാണ് പട്ടയം ലഭിച്ചത്. ഭൂമിയില്ലാത്ത ജില്ലയുടെ വിവിധ ഭാഗങ്ങളില്‍ നിന്നുള്ള ആദിവാസി കുടുംബങ്ങളാണ് കഴിഞ്ഞ വര്‍ഷം ജില്ലാ കൃഷിതോട്ടം കൈയേറി കുടില്‍ കെട്ടിയിരുന്നത്. ഇതിനെ തുടര്‍ന്ന് കഴിഞ്ഞ സര്‍ക്കാരിന്റെ കാലത്ത് തന്നെ ഇവര്‍ക്ക് പട്ടയം നല്‍കാനുള്ള നടപടികള്‍ ആരംഭിച്ചിരുന്നു.
പട്ടയം ലഭിച്ചതിനെ തുടര്‍ന്ന് ഇവിടെ താമസമാക്കിയ ആദിവാസി കുടുംബങ്ങള്‍ ഊരുകൂട്ടം ചേര്‍ന്നാണ് റോഡ്,  കുടിവെള്ളം, വൈദ്യുതി, ശൗചാലയങ്ങള്‍ തുടങ്ങിയ അടിസ്ഥാന സൗകര്യങ്ങള്‍ ഒരുക്കി തരണമെന്ന ആവശ്യം മുന്നോട്ട് വച്ചത്. നിര്‍ദേശങ്ങള്‍ സര്‍ക്കാരിന് സമര്‍പ്പിക്കുമെന്ന് ഊരുകൂട്ടത്തില്‍ സംബന്ധിച്ച  ട്രൈബല്‍ എക്‌സ്റ്റെന്‍ഷന്‍ ഓഫീസര്‍ ജോജോ ജോസഫ് പറഞ്ഞു. കവളങ്ങാട് ഗ്രാമപഞ്ചായത്ത് വൈസ് പ്രസിഡന്റ് എ.ജെ ഉലഹന്നാന്‍ ഊരുകൂട്ടം ഉദ്ഘാടനം ചെയ്തു. ഗ്രാമ പഞ്ചായത്തംഗം സിബി അദ്ധ്യക്ഷനായിരുന്നു.എ.ജി സാംകുട്ടി, സി രാജേഷ്, എ.എന്‍ ബാബു എന്നിവര്‍ പ്രസംഗിച്ചു.