കൊല്‍ക്കത്ത: മഴ പെയ്തതിനെ തുടര്‍ന്ന് പിച്ചില്‍ രൂപപ്പെട്ട ഈര്‍പ്പം മുതലെടുത്ത് ബൗളര്‍മാര്‍ നിറഞ്ഞാടിയപ്പോള്‍ വിജയം കൊല്‍ക്കത്തയ്‌ക്കൊപ്പം. ആദ്യം ബാറ്റ് ചെയ്ത കൊല്‍ക്കത്തയെ 19.3 ഓവറില്‍ 131 റണ്‍സില്‍ പുറത്താക്കാന്‍ ബാംഗ്ലൂരിന് സാധിച്ചെങ്കിലും അതേ നാണയത്തില്‍ തിരിച്ചടിച്ച കൊല്‍ക്കത്ത ബാംഗ്ലൂരിന്റെ പുകള്‍പെറ്റ ബാറ്റിങ് നിരയെ 50 റണ്‍സ് തികക്കാന്‍ പോലും അനുവദിക്കാതെ 9.2 ഓവറില്‍ വെറും 49 റണ്‍സില്‍ പുറത്താക്കി 82 റണ്‍സിന്റെ കൂറ്റന്‍ ജയം തന്നെ സ്വന്തമാക്കി. ഐ.പി.എല്ലിലെ മികച്ച വിജയങ്ങളിലൊന്നായും ഈ പോരാട്ടം മാറി.
ബാംഗ്ലൂരിന്റെ വെടിക്കെട്ട് വീരന്‍മാരെ ഇടംവലം തിരിയാന്‍ അനുവദിക്കാതെ കൊല്‍ക്കത്തയുടെ ബൗളര്‍മാര്‍ പന്തെറിഞ്ഞതോടെ അവര്‍ക്ക് ശ്വാസംമുട്ടി. ബാംഗ്ലൂരിന്റെ ഒരു ബാറ്റ്‌സ്മാനും രണ്ടക്കം കടക്കാന്‍ സാധിച്ചില്ല. ഒന്‍പത് റണ്‍സെടുത്ത കേദാര്‍ ജാദവാണ് ടോപ് സ്‌കോറര്‍. ഗെയ്ല്‍ (7), കോഹ്‌ലി (പൂജ്യം), മന്‍ദീപ് (ഒന്ന്), ഡിവില്ല്യേഴ്‌സ് (എട്ട്), ബിന്നി (എട്ട്), നെഗി (രണ്ട്), ബദ്രി (പൂജ്യം), മില്‍സ് (രണ്ട്), ചഹല്‍ (പാജ്യം) എന്നിവരെല്ലാം പെട്ടെന്ന് തന്നെ കൂടാരം കയറി.
രണ്ടോവറില്‍ ആറ് റണ്‍സ് വഴങ്ങി മൂന്ന് വിക്കറ്റെടുത്ത ക്രിസ് വോക്‌സും മൂന്നോവറില്‍ 21 റണ്‍സ് വഴങ്ങി മൂന്ന് വിക്കറ്റെടുത്ത കോള്‍ടര്‍ നെയ്‌ലും 1.2 ഓവറില്‍ നാല് റണ്‍സ് വഴങ്ങി രണ്ട് വിക്കറ്റ് വീഴ്ത്തിയ ഗ്രാന്‍ഡ്‌ഹോമും ഒരു വിക്കറ്റെടുത്ത ഉമേഷ് യാദവും ചേര്‍ന്ന് ബാംഗ്ലൂരിനെ എറിഞ്ഞിട്ടു.
ടോസ് നേടി ബാംഗ്ലൂര്‍ ബൗളിങ് തിരഞ്ഞെടുക്കുകയായിരുന്നു. കളിയുടെ തുടക്കത്തില്‍ മഴ പെയ്തതിനെ തുടര്‍ന്ന് അല്‍പ നേരം കഴിഞ്ഞാണ് മത്സരം തുടങ്ങിയത്. കൊല്‍ക്കത്തയുടെ തുടക്കം മിന്നല്‍ വേഗത്തിലായിരുന്നു. ബദ്രിയെറിഞ്ഞ ആദ്യ ഓവറില്‍ സുനില്‍ നരെയ്ന്‍ വാരിയത് 18 റണ്‍സ്. മൊത്തം 17 പന്തില്‍ ആറ് ഫോറും ഒരു സിക്‌സും പറത്തി നരെയ്ന്‍ മടങ്ങിയതോടെ കൊല്‍ക്കത്തയുടെ തകര്‍ച്ചയും തുടങ്ങി. ഗംഭീര്‍ (14), ഉത്തപ്പ (11), പാണ്ഡെ (15), പത്താന്‍ (എട്ട്), ഗ്രാന്‍ഡ്‌ഹോം (പൂജ്യം), കോള്‍ടര്‍നെയ്ല്‍ (രണ്ട്), കുല്‍ദീപ് (നാല്) എന്നിവര്‍ ക്ഷണത്തില്‍ മടങ്ങി. ക്രിസ് വോക്‌സ് 18ഉം സൂര്യകുമാര്‍ യാദവ് 15ഉം റണ്‍സെടുത്താണ് സ്‌കോര്‍ 100 കടത്തിയത്.
നാലോവറില്‍ 16 റണ്‍സ് മാത്രം വഴങ്ങി മൂന്ന് വിക്കറ്റെടുത്ത യുസ്‌വേന്ദ്ര ചഹലിന്റെ ബൗളിങാണ് കൊല്‍ക്കത്തയെ തകര്‍ത്തത്.