തിരുവനന്തപുരം: ഡിപ്ലോമാറ്റിക് ബാഗിലെ സ്വര്‍ണക്കടത്തുമായി ബന്ധപ്പെട്ട് തിരുവനന്തപുരം അന്താരാഷ്ട്ര വിമാനത്താവളത്തിലെ കാര്‍ഗോ കോംപ്ലക്‌സിലെ സി.സി.ടി.വി ദൃശ്യങ്ങള്‍ കസ്റ്റംസിന് കൈമാറി. കഴിഞ്ഞ വ്യാഴാഴ്ച്ചയാണ് കസ്റ്റംസ്  ദൃശ്യങ്ങള്‍ ആവശ്യപ്പെട്ടത്. ഇന്നലെ കസ്റ്റംസ് അസിസ്റ്റന്റ് കമ്മിഷണര്‍ എത്തി  ഹാര്‍ഡ് ഡിസ്‌ക് ഉള്‍പ്പെടെ ഏറ്റുവാങ്ങി.

 സ്വര്‍ണക്കടത്ത് നടത്തിയ ബാഗിന്റെ എയര്‍വേ ബില്ലില്‍ ഡിപ്ലോമാറ്റ് ബഗേജ് എന്നു തന്നെയാണ് രേഖപ്പെടുത്തിയിരുന്നതെന്നും ഈ ബാഗ് ഈ മാസം ഒന്നു മുതല്‍ 5 വരെ കാര്‍ഗോ കോംപ്ലക്‌സില്‍  സൂക്ഷിച്ചുവെന്നും കാര്‍ഗോ കോപ്ലക്‌സ് അധികൃതര്‍ കസ്റ്റംസിനെ അറിയിച്ചു. 

    നിലവില്‍ 23 സി.സി.ടി.വി കാമറകള്‍ കാര്‍ഗോ കോംപ്ലക്‌സിലുണ്ട്. ഈ സി.സി.ടി.വി ദൃശ്യങ്ങള്‍ കസ്റ്റംസ് അസി. കമ്മിഷണറുടെ മുറിയിലിരുന്ന് കാണാനും സൗകര്യമുണ്ടെന്നും കഴിഞ്ഞ ഒന്നര വര്‍ഷത്തിനിടെ രണ്ടു തവണ കസ്റ്റംസ് ആവശ്യപ്പെട്ട ദൃശ്യങ്ങള്‍ നല്‍കിയിട്ടുണ്ടെന്നും  കാര്‍ഗോ കോംപ്ലക്‌സ് ജനറല്‍ മാനേജര്‍ അറിയിച്ചു.