ചാവക്കാട്: വൃദ്ധ ദമ്പതികളായ ഗൃഹനാഥനേയും ഭാര്യയേയും വീടു കയറി മര്‍ദ്ദിച്ചവശരാക്കി. കടപ്പുറം വട്ടേകാട് അമ്പലത്ത് വീട്ടില്‍ അബു (60), ഭാര്യ നബീസകുട്ടി (54) എന്നിവര്‍ക്കാണ് ക്രുരമായ മര്‍ദ്ദനമേറ്റത്. സാരമായി പരുക്കേറ്റ അബുവിനെ ചാവക്കാട് താലൂക്ക് ആശുപത്രിയില്‍ പ്രവേശിപ്പിച്ചു.
ശനിയാഴ്ച രാത്രി ഏഴോടെയാണ് സംഭവം. അബുവും അയല്‍വാസിയായ കുഞ്ഞോനുമായി നേരത്തെ അതിര്‍ത്തി സംബന്ധിച്ച തര്‍ക്കം നിലവിലുണ്ടായിരുന്നു. ഇതുമായി ബന്ധപ്പെട്ട് കുഞ്ഞോന്റെ മകന്‍ നാസറിന്റെ സുഹൃത്ത് ഷറഫുദ്ദീന്‍ അബുവിന്റെ വീട്ടിലെത്തി സംസാരിച്ച് പോയിരുന്നു. ഏതാനും സമയത്തിനകം ഷറഫുദ്ദീന്‍ നാസറുമൊന്നിച്ച് വീണ്ടും അബുവിന്റെ വീട്ടില്‍ എത്തുകയും നാസര്‍ യാതൊരു പ്രകോപനവും കൂടാതെ അബുവിനെ മര്‍ദ്ദിക്കുകയും കഴുത്ത് ഞെരിച്ച് കൊല്ലാന്‍ ശ്രമിക്കുകയുമായിരുന്നു.
മര്‍ദ്ദനം തടയാന്‍ ഭാര്യ നഫീസകുട്ടി ശ്രമിച്ചപ്പോള്‍ അവരേയും മര്‍ദ്ദിച്ചവശയാക്കി. ബഹളം കേട്ട് നാട്ടുകാര്‍ എത്തിയതോടെ സംഘം രക്ഷപ്പെടുകയായിരുന്നു. ചാവക്കാട് പൊലിസ് പരാതി നല്‍കി. എന്നാല്‍ ഇതു സംബന്ധിച്ച് അന്വേഷണം നടത്തിയിട്ടില്ലെന്ന് വീട്ടുകാര്‍ ആരോപിച്ചു.