തിരുവനന്തപുരം: ടി.പി സെന്‍കുമാറിനെ സംസ്ഥാന പൊലിസ് മേധാവി സ്ഥാനത്ത് വീണ്ടും നിയമിക്കുന്നത് ഇന്നലത്തെ മന്ത്രിസഭായോഗം പരിഗണിച്ചില്ല. സുപ്രിംകോടതി വിധിയുടെ അടിസ്ഥാനത്തില്‍ നിയമപരമായ നടപടികള്‍ പരിശോധിക്കാന്‍ അഭിഭാഷകരോട് നിര്‍ദേശിച്ചിട്ടുണ്ട്.
സംസ്ഥാന പൊലിസ് മേധാവിയായി ഉടന്‍ നിയമിക്കണമെന്ന് ആവശ്യപ്പെട്ട് കഴിഞ്ഞ ദിവസം സെന്‍കുമാര്‍ ചീഫ് സെക്രട്ടറിക്ക് കത്തുനല്‍കിയിരുന്നു. സുപ്രിംകോടതി ഉത്തരവിന്റെ പകര്‍പ്പ് സഹിതമാണ് കത്തുനല്‍കിയത്. ജിഷ, പുറ്റിങ്ങല്‍ കേസുകളിലെ വീഴ്ച ആരോപിച്ചാണ് സെന്‍കുമാറിനെ പൊലിസ് മേധാവി സ്ഥാനത്തുനിന്ന് മാറ്റിയത്.
ഇതിനെതിരേ അദ്ദേഹം സുപ്രിംകോടതിയെ സമീപിക്കുകയായിരുന്നു. സെന്‍കുമാറിനെ പൊലിസ് മേധാവി സ്ഥാനത്ത് നിയമിക്കാന്‍ കഴിഞ്ഞ ദിവസം സുപ്രിം കോടതി ഉത്തരവിട്ടിരുന്നു. ജൂണ്‍ 30 വരെയാണ് സെന്‍കുമാറിന്റെ സര്‍വിസ് കാലാവധി.