ഷിംല: മകന്‍ ആശ്രയ് ശര്‍മ മാണ്ഡിയില്‍ നിന്നുള്ള കോണ്‍ഗ്രസ് ലോക്‌സഭാ സ്ഥാനാര്‍ഥിയായതോടെ ഹിമാചല്‍ പ്രദേശിലെ ഊര്‍ജമന്ത്രി അനില്‍ ശര്‍മ മന്ത്രിസഭയില്‍ നിന്നു രാജിവച്ചു. രാജി സന്തോഷത്തോടെ സ്വീകരിക്കുന്നതായി മുഖ്യമന്ത്രി ജയ് റാം താക്കൂര്‍ വ്യക്തമാക്കി. മകന്‍ കോണ്‍ഗ്രസില്‍ ചേരുന്നതിനു മുന്‍പേ അനില്‍ ശര്‍മ രാജിവെക്കേണ്ടിയിരുന്നെന്നും അദ്ദേഹം പറഞ്ഞു.

മാര്‍ച്ച് 25ന് അനില്‍ ശര്‍മയുടെ പിതാവും മുന്‍ കേന്ദ്രമന്ത്രിയുമായ സുഖ് റാമും ആശ്രയും കോണ്‍ഗ്രസില്‍ ചേര്‍ന്നിരുന്നു. മാര്‍ച്ച് 29ന് ആശ്രയ് മാണ്ഡിയിലെ കോണ്‍ഗ്രസ് സ്ഥാനാര്‍ഥിയാവുകയും ചെയ്തു. 2017ല്‍ മാണ്ഡിയില്‍ നിന്ന് ബി.ജെ.പി സ്ഥാനാര്‍ഥിയായാണ് അനില്‍ ശര്‍മ ജയിച്ചത്. തുടര്‍ന്ന് മന്ത്രിയാവുകയും ചെയ്തു. ലോക്‌സഭാ തെരഞ്ഞെടുപ്പില്‍ ചെറുമകന്‍ ആശ്രയിന് മാണ്ഡി സീറ്റ് ലഭിക്കുന്നതിനു വേണ്ടി സുഖ് റാം ബി.ജെ.പിയുമായി നേരത്തെ ചര്‍ച്ച നടത്തിയിരുന്നു. എന്നാല്‍ സിറ്റിങ് എം.പി രാംസ്വരൂപ് ശര്‍മയെ തന്നെ മത്സരിപ്പിക്കാനായിരുന്നു ബി.ജെ.പി തീരുമാനം.
അതോടെയാണ് സുഖ് റാമും ആശ്രയും ബി.ജെ.പി വിട്ടത്. സുഖ് റാം കുടുംബത്തിന്റേത് അവസരവാദ രാഷ്ട്രീയമാണെന്ന് മുഖ്യമന്ത്രി ആരോപിച്ചു.