ന്യൂഡല്‍ഹി: രാജ്യത്തെ മഹാമാരി കീഴടക്കാന്‍ തുടങ്ങിയ അന്നു മുതല്‍ പ്രതിരോധ രംഗത്ത് മുന്‍നിരയിലുണ്ടായിരുന്നു അയാള്‍. ജോഗിന്ദര്‍ ചൗധരിഎന്ന 27 കാരന്‍. കൊവിഡ് ബാധിതര്‍ക്കായി രാവെന്നും പകലെന്നുമില്ലാതെ ഓടി നടന്നു. മഹാമാരി അദ്ദേഹത്തേയും വെറുതെ വിട്ടില്ല. ഒടുവില്‍ സാന്ത്വനസ്പര്‍ശമനുഭവിച്ചവരെയെല്ലാം സങ്കടക്കടലില്‍ ആഴ്ത്തി അയാളും മരണത്തിലേക്ക്.

ബില്ലടക്കാനുള്ള പണം പോലും സ്വന്തമായില്ലായിരുന്നു ഒടുക്കം ആ യുവഡോക്ടര്‍ക്ക്. 3.4 ലക്ഷം രൂപയുടെ ആശുപത്രി ബില്ല് ഡോക്ടറുടെ കുടുംബത്തിന് താങ്ങാവുന്നതിലും അധികമായിരുന്നു. ഒടുവില്‍ സഹപ്രവര്‍ത്തകരാണ് തുക സ്വരൂപിച്ച് ബില്ല് അടച്ചത്.

ബാബാ സാഹേബ് അംബേദ്കര്‍ ആശുപത്രിയിലെ ഡോക്ടറായിരുന്നു ചൗധരി. ഇത് കൊവിഡ് സ്‌പെഷ്യല്‍ ആശുപത്രിയാണ്. ഇവിടെ നിന്നാണ് ഡോക്ടര്‍ക്ക് കൊവിഡ് ബാധിച്ചത്. ജൂണ്‍ 27നാണ് ഡോക്ടര്‍ക്ക് കൊവിഡ് സ്ഥിരീകരിച്ചത്. ലോക് നായക് ആശുപത്രിയില്‍ ആദ്യ ചികിത്സ.

ആരോഗ്യനില മോശമായതോടെ സര്‍ ഗംഗാറാം ആശുപത്രിയിലേക്ക് മാറ്റി. 3.4 ലക്ഷത്തിന്റെ ആശുപത്രി ബില്ലാണ് കുടുംബത്തിന് ലഭിച്ചത്. കര്‍ഷകനാണ് ജോഗിന്ദറിന്റെ അച്ഛന്‍. ആ കുടുംബത്തിന് താങ്ങാനാകുമായിരുന്നില്ല ആ ബില്ല്. സഹായം തേടി അച്ഛന്‍ ബാബാ സാഹേബ് അംബേദ്കര്‍ ഡോക്ടേഴ്‌സ് അസോസിയേഷനെ സമീപിച്ചു. സഹപ്രവര്‍ത്തകര്‍ 2.8 ലക്ഷം രൂപ സ്വരൂപിച്ച് അച്ഛന് നല്‍കി. ഡോക്ടറുടെ കുടുംബത്തിന്റെ അവസ്ഥ അസോസിയേഷന്‍ മുഖ്യമന്ത്രി അരവിന്ദ് കെജ്‌രിവാളിന്റെ ശ്രദ്ധയില്‍പ്പെടുത്തിയിട്ടുണ്ട്.

മധ്യപ്രദേശ് സ്വദേശിയായ ജോഗിന്ദര്‍ കഴിഞ്ഞ വര്‍ഷം നവംബറിലാണ് ഡല്‍ഹി ബാബാ സാഹേബ് ആശുപത്രിയില്‍ ജോലിയില്‍ പ്രവേശിച്ചത്. കൊവിഡ് രോഗികളെ ചികിത്സിച്ച ജാവേദ് അലി എന്ന ഡോക്ടറും കഴിഞ്ഞ ആഴ്ച കോവിഡ് ബാധിച്ച് ഡല്‍ഹിയില്‍ മരിച്ചിരുന്നു.