അഹമ്മദാബാദ്: 2026 ടി-20 ലോകകപ്പ് ഫൈനലിൽ ന്യൂസിലാൻഡിനെതിരെ ഇന്ത്യക്ക് ബാറ്റിംഗ്. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ കിവീസ് ക്യാപ്റ്റൻ മിച്ചൽ സാന്റ്നർ ബൗളിംഗ് തെരഞ്ഞെടുക്കുകയായിരിക്കുന്നു. കഴിഞ്ഞ മത്സരത്തിലെ അതേ പ്ലെയിങ് ഇലവൻ നിലനിർത്തിയാണ് ഇന്ത്യ കളത്തിൽ ഇറങ്ങുന്നത്. 

മലയാളി ക്രിക്കറ്റ് പ്രേമികൾക്കും ഈ ടി-20 ലോകകപ്പ് ഫൈനൽ ഏറെ സ്പെഷ്യലാണ്. കേരളത്തിന്റെ അഭിമാന താരം സഞ്ജു സാംസണിന്റ പോരാട്ടം തന്നെയാണ് മലയാളി ക്രിക്കറ്റ്‌ പ്രേമികളെ ആവേശത്തിലാക്കുന്നത്. കഴിഞ്ഞ രണ്ട് മത്സരങ്ങളിലും അർദ്ധ സെഞ്ച്വറി നേടി മിന്നും ഫോമിലാണ് സഞ്ജു. 

അതേസമയം 2024ൽ സ്വന്തമാക്കിയ ടി-20 കിരീടം സ്വന്തം മണ്ണിൽ നിലനിർത്തുകയെന്ന വലിയ ലക്ഷ്യവുമായാണ് സൂര്യകുമാർ യാദവും സംഘവും കളത്തിലിറങ്ങുന്നത്. ഈ ടൂർണമെന്റിൽ ഇന്ത്യയെ പരാജയപ്പെടുത്തിയ ഏക ടീം സൗത്ത് ആഫ്രിക്കയെ വീഴ്ത്തിയാണ് കിവികൾ ഫൈനലിലേക്ക് പറന്നത്. ഇംഗ്ലണ്ടിനെ പരാജയപ്പെടുത്തിയാണ് ഇന്ത്യ ഫൈനൽ യോഗ്യത ഉറപ്പാക്കിയത്. 

ഇന്ത്യയെ വീഴ്ത്തി ആദ്യ ടി-20 കിരീടം എന്ന നേട്ടമാണ് മിച്ചൽ സാന്റ്നർക്കും സംഘത്തിനും മുന്നിലുള്ളത്. ഇത് നാലാം തവണയാണ് ടീം ഇന്ത്യ ടി20 ലോകകപ്പ് ഫൈനലിലെത്തുന്നത്. 2007,2014,2024 വർഷങ്ങളിലാണ് ഇതിനു മുമ്പ് ഇന്ത്യ കലാശപ്പോരിനെത്തിയത്. 2007ൽ പാകിസ്ഥാനെയും 2024ൽ ദക്ഷിണാഫ്രിക്കയെയും വീഴ്ത്തി കിരീടം നേടിയപ്പോൾ 2014ൽ ശ്രീലങ്കയോട് പരാജയപ്പെടുകയായിരുന്നു. 2021ൽ മാത്രമാണ് ന്യൂസിലൻഡ് ഇതിനുമുമ്പ് ഫൈനൽ കളിച്ചത്. അന്ന് ഓസ്‌ത്രേലിയയോട് പരാജയപ്പെടുകയായിരുന്നു.

ടൂർണമെന്റിലെ മികച്ച രണ്ട് ടീമുകൾ കിരീട പോരാട്ടത്തിനായി നേർക്കുനേർ മത്സരക്കുമ്പോൾ അഹമ്മദാബാദിന്റെ മണ്ണിൽ തീപാറുമെന്ന് ഉറപ്പാണ്. 

ഇന്ത്യ പ്ലെയിങ് ഇലവൻ 

അഭിഷേക് ശർമ്മ, സഞ്ജു സാംസൺ (വിക്കറ്റ് കീപ്പർ) ഇഷാൻ കിഷൻ, സൂര്യകുമാർ യാദവ് (ക്യാപ്റ്റൻ), തിലക് വർമ്മ, ഹാർദിക് പാണ്ഡ്യ, ശിവം ദുബൈ, അക്ഷർ പട്ടേൽ, വരുൺ ചക്രവർത്തി, അർഷ്ദീപ് സിംഗ്, ജസ്പ്രീത് ബുംറ. 

ന്യൂസിലാൻഡ് പ്ലെയിങ് ഇലവൻ 

ടിം സീഫെർട്ട് (വിക്കറ്റ് കീപ്പർ), ഫിൻ അല്ലൻ, രചിൻ രവീന്ദ്ര, ഗ്ലെൻ ഫിലിപ്സ്, മാർക്ക് ചാപ്മാൻ, ഡാരിൽ മിച്ചൽ, ജെയിംസ് നീഷാം, മിച്ചൽ സാന്റ്നർ (ക്യാപ്റ്റൻ), മാറ്റ് ഹെൻറി, ലോക്കി ഫെർഗൂസൺ, ജേക്കബ് ഡഫി. 

India will bat against New Zealand in the 2026 T20 World Cup final. Kiwis captain Mitchell Santner won the toss and elected to bowl in the match to be held at the Narendra Modi Stadium in Ahmedabad. India will field with the same playing XI as in the last match.