കോഴിക്കോട്: പുതിയങ്ങാടി ദേശീയപാതയില്‍ കൂറ്റന്‍ മരം മറിഞ്ഞ് ഗതാഗതം തടസ്സപ്പെട്ടു. ഉച്ചയ്ക്ക് 12.30 മണിയോടെയാണ് മരം മറിഞ്ഞത്. മൂന്നു കാറുകള്‍ തകര്‍ന്നിട്ടുണ്ട്. കാറിലുണ്ടായിരുന്ന രണ്ടു പേര്‍ക്ക് പരുക്കേല്‍ക്കുകയും ചെയ്തു.

നാട്ടുകാര്‍ ഉടനെ മരം മുറിച്ചുമാറ്റാന്‍ തുടങ്ങി. ഇതിനിടെ ഒരാളുടെ കൈ മുറിയുകയും ആശുപത്രിയിലാക്കുകയും ചെയ്തു. കൂടി നിന്നവർക്കു മേല്‍ വീണ്ടും മരംപൊട്ടിവീണ് രണ്ടുപേർക്ക് പരുക്കേല്‍ക്കുകയും ചെയ്തു. രണ്ട് വാഗണ്‍ ആർ കാറുകളും ഒരു 800 കാറുമാണ് അപകടത്തില്‍പ്പെട്ടത്.

മരം മറിഞ്ഞ ഗതാഗത തടസ്സം ഉണ്ടായതോടെ വാഹനങ്ങള്‍ വഴിതിരിച്ചുവിട്ടിട്ടുണ്ട്. കണ്ണൂര്‍ ഭാഗത്തേക്കുള്ള വാഹനങ്ങള്‍ ബീച്ച് വഴി വെങ്ങാലിയിലാണ് എത്തേണ്ടത്. കോഴിക്കോട് ഭാഗത്തേക്കുള്ള വാഹനങ്ങള്‍ ബൈപ്പാസ് വഴിയും തിരിച്ചുവിട്ടു. ഫയര്‍ഫോഴ്‌സ് സംഘമെത്തി രക്ഷാപ്രവര്‍ത്തനം നടത്തുന്നു.