മൂന്നാര്‍: പ്രതിപക്ഷ നേതാവ് രമേശ് ചെന്നിത്തല, ഉപനേതാവ് ഡോ. എം.കെ മുനീര്‍ എന്നിവര്‍ ഇന്ന് മൂന്നാറിലെത്തും.മന്ത്രി എം.എം മണി രാജിവയ്ക്കണമെന്നാവശ്യപ്പെട്ട് പെമ്പിളൈ ഒരുമൈ നിരാഹാര സമരം നടത്തി വരുന്ന സമരപ്പന്തല്‍ ഇവര്‍ സന്ദര്‍ശിക്കും.

സമരം മൂന്നാം ദിവസം പിന്നിടുമ്പോള്‍ സമര നേതാക്കളുടെ ആരോഗ്യ സ്ഥിതിയില്‍ ആശങ്ക. ആരോഗ്യസ്ഥിതി കൂടുതല്‍ വഷളാകുന്നത് കണക്കിലെടുത്ത് സമരം നടത്തുന്നവരെ അറസ്റ്റ് ചെയ്ത് നീക്കണമെന്ന് ജില്ലാ പൊലിസ് മേധാവി പി. വേണുഗോപാല്‍ മൂന്നാര്‍ ഡി.വൈ.എസ്.പി ക്ക് നിര്‍ദേശം നല്‍കി. വൈദ്യപരിശോധനക്ക് ശേഷം നിരാഹാരം കിടക്കുന്ന ഗോമതിയുടെയും രാജേശ്വരിയുടെയും ആരോഗ്യനില മോശമായതായി ഡോക്ടര്‍മാര്‍ പറഞ്ഞു.

സമരത്തിന് പിന്തുണയര്‍പ്പിച്ച് സമരം നടത്തുന്ന ആം ആദ്മി പാര്‍ട്ടി നേതാവ് സി.ആര്‍ നീലകണഠന്റെയും ആരോഗ്യനില വഷളായി. ഇതോടെയാണ് നിരാഹാരം അനുഷ്ഠിക്കുന്നവരെ ആരോഗ്യസ്ഥിതി കണക്കിലെടുത്ത് അറസ്റ്റ് ചെയ്ത് നീക്കാന്‍ ജില്ലാ പൊലിസ് മേധാവി നിര്‍ദേശം നല്‍കിയത്.

അഞ്ച് ദിവസമായി പൊമ്പിളൈ ഒരുമൈ മൂന്നാറില്‍ സമരം നടത്തി വരികയാണ്. മന്ത്രി എം.എം മണി രാജിവെക്കുന്നതുവരെ നിരാഹാര സമരം തുടരാനാണ് പൊമ്പിളൈ ഒരുമയുടെ തീരുമാനം.