മുക്കം: വര്‍ഗീയത പറഞ്ഞ് രാജ്യത്തെ വിഭജിക്കാനാണ് നരേന്ദ്രമോദി ശ്രമിക്കുന്നതെന്ന് എ.ഐ.സി.സി വക്താവ് ഖുശ്ബു. മുക്കത്തെ യു.ഡി.എഫ് കേന്ദ്ര കമ്മിറ്റി ഓഫിസില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു അദ്ദേഹം. നരേന്ദ്രമോദി ഇന്ത്യയുടെ പ്രധാനമന്ത്രിയാണ്, ഒരു പ്രത്യേക മതത്തിന്റെ പ്രധാനമന്ത്രിയല്ല. താന്‍ ഹിന്ദുക്കളുടെ പ്രധാനമന്ത്രിയാണെന്നാണ് നരേന്ദ്രമോദി പറയുന്നത്.
കഴിഞ്ഞ അഞ്ച് വര്‍ഷ കാലത്ത് പ്രചരിപ്പിക്കപ്പെട്ട വെറുപ്പിന്റെ രാഷ്ട്രീയം ഇന്ത്യയുടെ ചരിത്രത്തില്‍ സമാനതകളില്ലാത്തതാണ്. ഏകാധിപതിയായ മോദിയുടെ ഭരണമല്ല, കോണ്‍ഗ്രസിന്റെ ഭരണമാണ് ജനങ്ങള്‍ ആഗ്രഹിക്കുന്നതെന്നും ഖുഷ്ബു പറഞ്ഞു. ഉണ്ട്. ബി.ജെ.പിയുടെ ഭരണകാലത്ത് അത് കൂടുതല്‍ വര്‍ധിച്ചിട്ടുണ്ട്. ജാതി, മതങ്ങള്‍ക്കതീതമായി കേരളത്തിലെ ജനങ്ങളുടെ ബഹുമാനവും സ്‌നേഹവും കണ്ടാണ് രാഹുല്‍ഗാന്ധി മത്സരിക്കാന്‍ വയനാട് തെരഞ്ഞെടുത്തത്. രാജ്യത്തെ എല്ലാ ജനങ്ങളെയും പരിഗണിക്കുന്നതാണ് കോണ്‍ഗ്രസിന്റെ പ്രകടനപത്രിക. കോണ്‍ഗ്രസിന്റെ ആദ്യ പരിഗണന തൊഴില്‍ അവസരം സൃഷ്ടിക്കുകയും രാജ്യത്തെ കാര്‍ഷിക പ്രതിസന്ധി പരിഹരിക്കുക എന്നതുമാണ്. രാജസ്ഥാനിലും ഛത്തിസ്ഗഡിലും മധ്യപ്രദേശിലേയും പോലെ കോണ്‍ഗ്രസ് അധികാരത്തിലെത്തിയാല്‍ കാര്‍ഷിക കടങ്ങള്‍ എഴുതിത്തള്ളും. വിദ്യാഭ്യാസത്തിന് വലിയ പ്രാധാന്യമാണ് കോണ്‍ഗ്രസ് പ്രകടന പത്രികയില്‍ നല്‍കിയിട്ടുള്ളത്. അധികാരത്തിലെത്തിയാല്‍ പന്ത്രണ്ടാം ക്ലാസ് വരെ നിര്‍ബന്ധിതവും സൗജന്യവുമായ വിദ്യാഭ്യാസം നടപ്പിലാക്കും. ന്യായ് ഇന്ത്യയിലെ ദരിദ്ര ജനങ്ങളുടെ പട്ടിണി മാറ്റാന്‍ ഏറ്റവും ഫലപ്രദമായ പദ്ധതിയാണെന്നും അവര്‍ പറഞ്ഞു.