തിരുവനന്തപുരം: സ്വര്‍ണക്കടത്ത് കേസിലെ പ്രതി സ്വപ്‌ന സുരേഷിനെതിരേ ആദായ നികുതി വകുപ്പിന്റെ അന്വേഷണം. സ്വപ്നയുടെ സമ്പാദ്യം സംബന്ധിച്ച എന്‍.ഐ.എ വെളിപ്പെടുത്തലിന്റെ പശ്ചാത്തലത്തിലാണ് പരിശോധന.

തിരുവനന്തപുരത്തെ രണ്ട് ബാങ്കുകളിലായുള്ള സ്വപ്നയുടെ ലോക്കറില്‍ നിന്നും പണവും സ്വര്‍ണവും അടക്കം രണ്ട് കോടി രൂപയുടെ ആസ്തി ആദായനികുതി വകുപ്പ് കണ്ടെടുത്തിരുന്നു. പണവും സ്വര്‍ണവും ആയാണ് സമ്പാദ്യം കണ്ടെടുത്തത്.

അതേ സമയം കോടികള്‍ കൈവശമുണ്ടായിട്ടും സ്വപ്‌ന സുരേഷ് ആദായനികുതി അടച്ചിരുന്നില്ല. ഇത് കണക്കിലെടുത്താണ് ആദായനികുതി വകുപ്പ് അന്വേഷണം ആരംഭിച്ചത്. സ്വപ്നയുടെ ബാങ്ക് ഇടപാടുകളള്‍ അടക്കം പരിശോധിക്കാനാണ് ആദായനികുതി വകുപ്പിന്റെ തീരുമാനം. കസ്റ്റംസും ആദായനികുതി വകുപ്പിന് വിവരങ്ങള്‍ കൈമാറും.