കോഴിക്കോട്: യോഗ്യതക്കനുസരിച്ച സര്‍ക്കാര്‍ ജോലി നേടുകയെന്ന ഏറെക്കാലത്തെ ആഗ്രഹം പൂവണിയുന്നതിലുള്ള സന്തോഷവുമായാണ് വെള്ളിമാട്കുന്ന് നിഷി മന്‍സിലിലെ സാഹിറ ബാനു നാട്ടിലേക്ക് മടങ്ങിയത്. 

ആയുര്‍വേദ ഫാര്‍മസിസ്റ്റ് തസ്തികയില്‍ പി.എസ്. സി ലിസ്റ്റിലുള്ള സാഹിറയ്ക്ക് അടുത്തുതന്നെ നിയമനം ലഭിക്കാന്‍ സാധ്യതയുണ്ടായിരുന്നു.  ഇതു കണക്കിലെടുത്താണ് കുട്ടികളോടൊപ്പം ദുബൈയില്‍ നിന്ന് നാട്ടിലേക്കു മടങ്ങാന്‍ തീരുമാനിച്ചത്.  മകളുടെ  വരവില്‍ വീട്ടുകാരും ആഹ്ലാദത്തിലായിരുന്നു. ജോലിയെ കുറിച്ചുള്ള സ്വപ്നങ്ങളുമായി 

വെള്ളിയാഴ്ച വൈകിട്ട് ദുബൈയില്‍നിന്ന് വിമാനം കയറിയ സാഹിറയുടെ എല്ലാ സ്വപ്നങ്ങളും കരിപ്പൂരിലെ താഴ്ചയിലേക്ക് തകര്‍ന്നടിയുകയായിരുന്നു.കൂടെയുണ്ടായിരുന്ന പതിനൊന്നുമാസം മാത്രം പ്രായമുള്ള മകന്‍ അസം മുഹമ്മദും മരിച്ചു. മറ്റു മക്കളായ മറിയം ബിന്‍ത്  മുഹമ്മദ്(എട്ട്), ലഹാന്‍ മുഹമ്മദ് (നാല്) എന്നിവര്‍ കോഴിക്കോട്ടെ സ്വകാര്യ ആശുപത്രികളില്‍ ചികിത്സയിലാണ്. സാഹിറയുടെ ഭര്‍ത്താവ് പൂളക്കല്‍ മുഹമ്മദ് ഇജാസ് ദുബൈയില്‍ അക്കൗണ്ടന്റാണ്. സാഹിറയുടെ മൂന്നാമത്തെ പ്രസവത്തിനുശേഷമാണ് ഇവര്‍ മക്കളോടൊപ്പം ദുബൈയിലേക്ക് പോയത്. 

വെള്ളിയാഴ്ച രാത്രി എത്തുമെന്ന് വിവരം ലഭിച്ചതിനാല്‍ സാഹിറയ്ക്കും മക്കള്‍ക്കും ക്വാറന്റൈനില്‍ കഴിയാനുള്ള സൗകര്യവും വീട്ടില്‍ ഒരുക്കിയിരുന്നു. മരണ വിവരമറിഞ്ഞ  ഭര്‍ത്താവ് ഇജാസ് ഇന്നലെ രാത്രി വീട്ടിലെത്തി. ശേഷമായിരുന്നു സാഹിറയുടെയും കുഞ്ഞിന്റെയും ഖബറടക്കം.  മുക്കം കക്കാട് മഞ്ചറ മുഹമ്മദലിയുടെയും  സക്കീനയുടെയും മകളാണ് സാഹിറ.