വടക്കാഞ്ചേരി: ഭര്‍തൃമതിയായ യുവതിയെ കൂട്ട ബലാത്സംഗത്തിന് ഇരയാക്കിയെന്ന പരാതിയില്‍ പ്രതി ചേര്‍ക്കപ്പെട്ട നഗരസഭാ കൗണ്‍സിലര്‍ പി.എന്‍. ജയന്തന്‍ ഉള്‍പ്പെടെയുള്ള നാല്‌പേരും നുണ പരിശോധനക്ക് വിധേയമാകാന്‍ തയാറാണെന്ന് കോടതിയെ അറിയിച്ചു.
ജയന്തന്റെ ബന്ധുക്കളും സഹോദരങ്ങളുമായ പറങ്ങനാട്ട് ജനീഷ്,ബിനീഷ്, പുലിക്കുന്നത്ത് ഷിബു എന്നിവരാണ് നുണപരിശോധനക്ക് തയാറായത്.
ഇന്നലെ കോടതിയില്‍ ഹാജരായാണ് പ്രതികള്‍ സമ്മതം അറിയിച്ചത്. ഇതിനാവശ്യമായ അനുമതി നല്‍കണമെന്ന് ആവശ്യപ്പെട്ട് പ്രത്യേക അന്വേഷണ സംഘം മേധാവിയും പാലക്കാട് എ.എസ്.പിയുമായ ജി.പൂങ്കുഴലി മജിസ്‌ട്രേറ്റ് കോടതിയില്‍ റിപ്പോര്‍ട്ട് നല്‍കിയിരുന്നു.
കേസില്‍ കൂടുതല്‍ തെളിവുകള്‍ ശേഖരിക്കുന്നതിന് ഇത് അനിവാര്യമാണെന്നായിരുന്നു അന്വേഷണ സംഘത്തിന്റെ നിലപാട്.
റിപ്പോര്‍ട്ടിന്റെ അടിസ്ഥാനത്തില്‍ കോടതി നാല് പേര്‍ക്കും സമന്‍സ് അയച്ചു. ഇന്നലെ കേസ് വീണ്ടും പരിഗണിച്ചു. നുണ പരിശോധനക്ക് തങ്ങള്‍ തയാറാണെന്ന് ജയന്തന്‍ ഉള്‍പ്പെടെയുള്ളവര്‍ നേരത്തെ നിലപാട് വ്യക്തമാക്കിയിരുന്നു. എന്നാല്‍ അന്വേഷണ സംഘം മൗനം പാലിക്കുകയായിരുന്നു. ഇത് വലിയ പ്രതിഷേധവും ക്ഷണിച്ച് വരുത്തി.
വടക്കാഞ്ചേരി മജിസ്‌ട്രേറ്റ് കോടതിയുടെ നിരീക്ഷണത്തിലാണ് അന്വേഷണം നടക്കുന്നത്. ഇന്നലെ കോടതിയില്‍ ഹാജരായ പ്രതികളില്‍ നിന്ന് കോടതി രഹസ്യമൊഴി രേഖപ്പെടുത്തി.
ഇരയുടെ അഭിഭാഷകര്‍ ഇതിനെ എതിര്‍ത്തെങ്കിലും കോടതി അനുവദിച്ചില്ല.
പ്രതികളെ നാര്‍ക്കോ അനാലിസിസിന് വിധേയമാക്കണമെന്ന് ഇരയുടെ അഭിഭാഷകര്‍ വാദിച്ചെങ്കിലും ഇതും അംഗീകരിച്ചില്ല.