ഇടുക്കി: മൂന്നാറിലെ പാപ്പാത്തിച്ചോല മോഡലില്‍ ഇടുക്കിയിലും കുരിശുകള്‍ സ്ഥാപിച്ച് വന്‍തോതില്‍ ഭൂമി കൈയേറിയിട്ടുണ്ടെന്ന് കണ്ടെത്തല്‍. ഇടുക്കി ജില്ലയിലെ തന്നെ വാഗമണിനടുത്ത് പുളളിക്കാനത്താണ് വ്യാപകമായി കുരിശുകള്‍ സ്ഥാപിച്ച് ഏക്കറുകണക്കിന് പുല്‍മേടുകള്‍ കൈയേറിയത്.

പുളളിക്കാനം സെന്റ് തോമസ് അധികൃതരാണ് ഭൂമി കൈയേറിയതാണെന്നാണ് കണ്ടെത്തല്‍. ഒരു സ്വകാര്യ ചാനല്‍ പുറത്തുവിട്ട റിപ്പോര്‍ട്ടിലാണ് വ്യാപക ഭൂമി കൈയേറ്റം കണ്ടെത്തിയത്.

കുരിശുകള്‍ സ്ഥാപിച്ച് അതീവ പരിസ്ഥിതി ദുര്‍ബല പ്രദേശത്താണ് 50 ഏക്കറിലധികം ഭൂമി കൈയേറിയിരിക്കുന്നത്. സര്‍ക്കാര്‍ ഭൂമിയാണ് കൈയേറിയിരിക്കുന്നതെന്നും ഇതു തിരിച്ചു പിടിക്കണമെന്നുമാവശ്യപ്പെട്ട് ഇവിടുത്തെ വില്ലേജ് ഓഫിസര്‍ തഹസില്‍ദാര്‍ക്ക് റിപ്പോര്‍ട്ട് നല്‍കിയിട്ടുണ്ട്.

അതേസമയം, കുരിശു സ്ഥാപിച്ചതുമായി തങ്ങള്‍ക്ക് ബന്ധമില്ലെന്നും ആരാണ് ഇതു സ്ഥാപിച്ചതെന്ന് അറിയില്ലെന്നും സെന്റ് തോമസ് പള്ളി അധികൃതര്‍ പ്രതികരിച്ചു. നേരത്തെ മൂന്നാറിലെ പാപ്പാത്തിച്ചോലയില്‍ സ്പിരിറ്റ് ഇന്‍ ജീസസ് എന്ന സംഘടന കുരിശു സ്ഥാപിച്ച് ഭൂമി കൈയേറിയിരുന്നു. ഇതു ദേവികളും സബ് കലക്റ്ററുടെ നേതൃത്വത്തില്‍ തിരിച്ചു പിടിച്ചത് ഏറെ വിവാദമായിരുന്നു.