പയ്യന്നൂര്‍: ബി.ജെ.പി പ്രവര്‍ത്തകന്‍ അന്നൂരിലെ സി.കെ രാമചന്ദ്രന്റെ കൊലപാതകവുമായി ബന്ധപ്പെട്ട കേസില്‍ പ്രതികളുടെ അറസ്റ്റു വൈകുന്നു. അമ്പതോളം സി.പി.എം പ്രവര്‍ത്തകര്‍ക്കെതിരേ കേസെടുത്തിട്ടുണ്ടെങ്കിലും പ്രതികളെ കണ്ടെത്തുന്നതിലും അറസ്റ്റു ചെയ്യുന്നതിലും പൊലിസ് ആശയക്കുഴപ്പത്തിലാണ്. രാമചന്ദ്രന്റെ ഭാര്യയുടെ നിര്‍ണായക മൊഴിയാണ് പൊലിസിനെ കുഴയ്ക്കുന്നത്.
കേസില്‍ നാല് സി.പി.എം പ്രവര്‍ത്തകര്‍ കസ്റ്റഡിയിലുണ്ടെന്ന് സൂചനയുണ്ടെങ്കിലും ഇവരുടെ അറസ്റ്റ് രേഖപ്പെടുത്തിയിട്ടില്ല. മറ്റു പ്രതികളെ പിടികൂടിയാലും മൊഴിയുടെ അടിസ്ഥാനത്തിലുള്ള രണ്ട് സി.പി.എം നേതാക്കളെ അറസ്റ്റു ചെയ്യാന്‍ കഴിയാത്ത സ്ഥിതിയാണ്. രാമചന്ദ്രന്റെ അമ്മയുടെയും ഭാര്യയുടെയും പരാതിയില്‍ കൊലപാതകത്തില്‍ ഉള്‍പ്പെട്ടവരെ തിരിച്ചറിഞ്ഞതായി സൂചനയുണ്ട്. എന്നാല്‍ സംഭവം കഴിഞ്ഞ് ഒരാഴ്ച പിന്നിടുമ്പോഴും ഇവരെ അറസ്റ്റു ചെയ്യാന്‍ പൊലിസ് തയാറായിട്ടില്ല. രണ്ട് കൊലപാതകങ്ങളിലും പ്രതികളായവരെ ഒന്നിച്ച് അറസ്റ്റ് ചെയ്യാനായിരുന്നു പൊലിസ് ആദ്യം നീക്കം നടത്തിയത്. പിന്നീടത് മാറ്റി. സി.പി.എം പ്രവര്‍ത്തകന്റെ കൊലപാതകത്തില്‍ നാല് ആര്‍.എസ്.എസ് പ്രവര്‍ത്തകരെ കഴിഞ്ഞ ദിവസം അറസ്റ്റു ചെയ്തിരുന്നു. കേസില്‍ സി.പി.എം പ്രവര്‍ത്തകര്‍ സ്റ്റേഷനിലെത്തി കീഴടങ്ങുമെന്ന് അഭ്യൂഹം പ്രചരിക്കാന്‍ തുടങ്ങിയിട്ട് രണ്ടു ദിവസമായി. പലരും ഒളിവിലാണെന്നും സൈബര്‍ സെല്ലിന്റെ സഹായത്തോടെ ഇവരെ കണ്ടെത്താനുള്ള ശ്രമത്തിലാണെന്നും പൊലിസ് അറിയിച്ചു. അറസ്റ്റ് വൈകുന്നതിലെ പ്രതിഷേധം ബി.ജെ.പി നേതാക്കള്‍ കഴിഞ്ഞ ദിവസം അന്വേഷണ ചുമതലയുള്ള സി.ഐ സി.എ അബ്ദുല്‍ റഹീമിനെ അറിയിക്കുകയും ചെയ്തിരുന്നു.