കളമശ്ശേരി: മാതാവിന്റെ ക്രൂരമായ മര്‍ദനത്തെ തുടര്‍ന്ന് തലക്ക് ഗുരുതരമായി പരുക്കേറ്റ് ചികിത്സയിലിരിക്കെ മൂന്നുവയസുകാരന്‍ മരണപ്പെട്ട സംഭവത്തില്‍ പിതാവ് അറസ്റ്റില്‍. പശ്ചിമ ബംഗാള്‍ സ്വദേശിയായ ഷാജത്ഖാനെ (34)യാണ് ഏലൂര്‍ പൊലിസ് അറസ്റ്റ് ചെയ്തത്. സംഭവത്തില്‍ കൊലക്കുറ്റം ചുമത്തി ഝാര്‍ഖണ്ഡ് സ്വദേശിനിയായ മാതാവ് ഹെനയെ (28) നേരത്തെ തന്നെ പൊലിസ് അറസ്റ്റ് ചെയ്തിരുന്നു. ഇവര്‍ ഇപ്പോള്‍ റിമാന്‍ഡിലാണ്. ക്രൂര മര്‍ദനത്തെ തുടര്‍ന്ന് അബോധാവസ്ഥയിലായ കുട്ടിയെ ബുധനാഴ്ച ആശുപത്രിയില്‍ എത്തിച്ചപ്പോഴും മാതാവിന്റെ ക്രൂര മര്‍ദനം ഡോക്ടര്‍മാരില്‍നിന്നും പിതാവ് മറച്ചുവയ്ക്കുകയായിരുന്നുവെന്ന് പൊലിസ് പറഞ്ഞു. മാത്രമല്ല, മാസങ്ങളായി കുഞ്ഞിന് മാതാവില്‍നിന്ന് നിരന്തര പീഡനമുണ്ടായിട്ടും ഇത് തടയുന്നതിനുള്ള യാതൊരു വിധ നടപടിയും ഉണ്ടാകാത്ത സാഹചര്യം കണക്കിലെടുത്തുമാണ് പൊലിസ് ഇയാളുടെ അറസ്റ്റ് രേഖപ്പെടുത്തിയതെന്ന് ഏലൂര്‍ എസ്.എച്ച്.ഒ. ജിന്‍സ്റ്റന്‍ പറഞ്ഞു. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തു.