ന്യൂഡല്‍ഹി: ദേശീയത പ്രോത്സാഹിപ്പിക്കുന്നതിനായി ഒന്നാം ക്ലാസ് മുതല്‍ എട്ടാം ക്ലാസ് വരെയുള്ള പാഠ്യപദ്ധതിയില്‍ ഹിന്ദി നിര്‍ബന്ധമാക്കി എല്ലാ സംസ്ഥാനങ്ങള്‍ക്കും നിര്‍ദേശം നല്‍കണമെന്ന ഹരജി സുപ്രിം കോടതി തള്ളി. ബി.ജെ.പി ഡല്‍ഹി ഘടകം വക്താവ് അശ്വിനികുമാര്‍ ഉപാധ്യായ നല്‍കിയ ഹരജിയാണ് ചീഫ് ജസ്റ്റിസ് ജെ.എസ്. ഖെഹാര്‍ അധ്യക്ഷനായ ബഞ്ച് തള്ളിയത്.
ഇത്തരമൊരു ഹരജി നല്‍കിയതിന്റെ ലക്ഷ്യമെന്താണെന്ന് ചോദിച്ച കോടതി ഇക്കാര്യത്തില്‍ ഒരു രാഷ്ട്രീയ പാര്‍ട്ടി എന്തിനാണ് ഇതിനുവേണ്ടി വാദിക്കുന്നതെന്നും ചോദിച്ചു. അഭിഭാഷകന്‍ കൂടിയായ ഹരജിക്കാരന്‍ ഇത്തരമൊരു ആവശ്യവുമായി കോടതിയെ സമീപിച്ചതിനെ സുപ്രിം കോടതി രൂക്ഷമായി വിമര്‍ശിക്കുകയും ചെയ്തു. ഇപ്പോള്‍തന്നെ രാജ്യത്തെ എല്ലാ സ്‌കൂളുകളിലും ഹിന്ദി, ഇംഗ്ലീഷ്, പ്രാദേശിക ഭാഷ എന്നിവ പഠിപ്പിക്കുന്നുണ്ട്. ഹിന്ദി സംസാരിക്കാത്ത സംസ്ഥാനങ്ങളില്‍ ഇവ അടിച്ചേല്‍പ്പിക്കാന്‍ ഒരു കാരണവശാലും അനുവദിക്കാനാകില്ലെന്ന് കോടതി ചൂണ്ടിക്കാട്ടി.