കിഴിശ്ശേരി: ചെറപ്പാലത്ത് വീടിന് തീ പിടിച്ച് ഒന്നര ലക്ഷം രൂപയുടെ നഷ്ടം. കുഴിമണ്ണ പഞ്ചായത്ത് ആറാം വാര്‍ഡില്‍ മടത്തിങ്ങല്‍ ചെറപ്പാലം എ.പി മുഹമ്മദിന്റെ ഉടമസ്ഥതയിലുള്ള വീടിനാണ് തീ പിടിച്ചത്. തീ പിടുത്തത്തില്‍ വീട് ഭാഗീകമായി നശിച്ചു.
ഇന്നലെ ഉച്ചക്ക് പന്ത്രണ്ടോടെയാണ് സംഭവം. സിറ്റൗട്ടിനോട് ചേര്‍ന്നുള്ള ഓഫിസ് റൂമില്‍ നിന്നാണ് തീ പടരുന്നതായി കണ്ടത്. റൂമില്‍ ഉണ്ടായിരുന്ന ഗൃഹോപകരണങ്ങളും മേല്‍ക്കൂരയും കത്തിനശിച്ചു. റൂമില്‍ അലമാരയില്‍ ഉണ്ടായിരുന്ന വസ്ത്രങ്ങളും പൈസയും കത്തി നശിച്ചവയില്‍പ്പെടും. വീടിന്റെ ഭിത്തികളും തീപിടുത്തത്തില്‍ നശിച്ചിട്ടുണ്ട്. തീ പിടുത്തത്തിന്റെ കാരണം വ്യക്തമായിട്ടില്ലെങ്കിലും ഷോര്‍ട്ട് സര്‍ക്ക്യൂട്ടാണ് തീ പിടുത്തത്തിന് കാരണമെന്നാണ് നിഗമനം. തീ പടരുന്നത് കണ്ട് ഓടിക്കൂടിയ അയല്‍ വാസികളും നാട്ടുകാരും ചേര്‍ന്നാണ് തീയണച്ചത്. പഞ്ചായത്ത് പ്രസിഡന്റ് ബാലത്തില്‍ ബാപ്പു, വാര്‍ഡു മെമ്പര്‍മാരായ അബ്ദുല്‍ ജലീല്‍, വി.ടി അബ്ദു റസാഖ് എന്നിവര്‍ സംഭവസ്ഥലം സന്ദര്‍ശിച്ചു.