ലഖ്‌നോ: ഉത്തര്‍പ്രദേശിലെ മുറാദാബാദില്‍ ബി.ജെ.പി പ്രവര്‍ത്തകര്‍ പോളിങ് ഓഫിസറെ കൈയേറ്റം ചെയ്തു. സമാജ് വാദി പാര്‍ട്ടിയുടെ ചിഹ്നമായ സൈക്കിളിന് വോട്ട് ചെയ്യാന്‍ വോട്ടര്‍മാരോട് ആവശ്യപ്പെട്ടെന്ന് ആരോപിച്ച് പോളിങ് ഓഫിസര്‍ മുഹമ്മദ് സുബൈറിനെയാണ് ബി.ജെ.പി പ്രവര്‍ത്തകര്‍ മര്‍ദിച്ചത്. മണ്ഡലത്തിലെ വനിതകള്‍ക്കായി പ്രത്യേകം തയ്യാറാക്കിയ ബൂത്ത് നമ്പര്‍ 231ലെ ഓഫിസര്‍ ആയിരുന്നു മുഹമ്മദ് സുബൈര്‍. ഇക്കാര്യം ചോദ്യം ചെയ്യുന്നതിനൊപ്പം പ്രവര്‍ത്തകര്‍ മര്‍ദനവും തുടങ്ങുകയായിരുന്നു. പൊലിസ് എത്തിയാണ് അക്രമികളില്‍ നിന്ന് ഓഫിസറെ രക്ഷിച്ചത്. മര്‍ദനമേറ്റ ഉദ്യോഗസ്ഥനെ പിന്നീട് തെരഞ്ഞെടുപ്പു ചുമതലകളില്‍ നിന്നു മാറ്റി. എന്നാല്‍, ആക്രമണത്തില്‍ പങ്കെടുത്തവര്‍ക്കെതിരേ ഇതുവരെ നടപടിയുണ്ടായിട്ടില്ല.

പരാതിയുണ്ടായിരുന്നുവെങ്കില്‍ ബന്ധപ്പെട്ടവരെ അറിയിക്കുകയായിരുന്നു വേണ്ടതെന്നാണ് ഇതിനോട് റിട്ടേണിങ് ഓഫിസര്‍ പ്രതികരിച്ചത്. ബി.ജെ.പിയുടെ സിറ്റിങ് എം.പി കുന്‍വാര്‍ സര്‍വേശ് സിങ്ങും എസ്.പി-ബി.എസ്.പി മുന്നണി സ്ഥാനാര്‍ഥി ഡോ. എസ്.ടി ഹസനും ആണ് മണ്ഡലത്തില്‍ പ്രധാനമായും മല്‍സരിക്കുന്നത്.