ചേളാരി: മുഅല്ലിം ഡേ ദിനാചരണം വിജയിപ്പിക്കാന്‍ സമസ്ത നേതാക്കള്‍ ആഹ്വാനംചെയ്തു. കൊവിഡ് പ്രത്യേക സാഹചര്യത്തില്‍ അതിജീവനത്തിന്റെ പാതയിലാണ് നാം, പ്രത്യേകിച്ചം മദ്‌റസാ അധ്യാപകര്‍. മതമേഖലകള്‍ പരിപോഷിപ്പിക്കേണ്ടതും ദീനീ സംരംഭങ്ങള്‍ പരിപാലിക്കേണ്ടതും വിശ്വാസികളുടെ ബാധ്യതയാണ്.
മദ്‌റസാ പ്രസ്ഥാനത്തിന്റെ ജീവനാഡികളായ മുഅല്ലിംകളെ എല്ലാ നിലയിലും സഹായിക്കേണ്ടത് നമ്മുടെ കടമയാണ്. അവരുടെ ക്ഷേമ പ്രവര്‍ത്തനങ്ങള്‍ക്ക് തണലായ മുഅല്ലിം ക്ഷേമനിധിയുടെ വിപുലീകരണാര്‍ഥം ഇന്ന് നടക്കുന്ന മുഅല്ലിം ഡെ പരിപാടിയില്‍ എല്ലാവരും പങ്കുചേരണമെന്നും വന്‍ വിജയമാക്കണമെന്നും സമസ്ത കേരള ജംഇയ്യത്തുല്‍ ഉലമ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍, ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍, വിദ്യാഭ്യാസ ബോര്‍ഡ് പ്രസിഡന്റ് പി.കെ.പി അബ്ദുസ്സലാം മുസ്‌ലിയാര്‍, ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍, ജംഇയ്യത്തുല്‍ മുഅല്ലിമീന്‍ പ്രസിഡന്റ് ഡോ. ബഹാഉദ്ദീന്‍ മുഹമ്മദ് നദ്‌വി, ജനറല്‍ സെക്രട്ടറി വാക്കോട് മൊയ്തീന്‍കുട്ടി ഫൈസി എന്നിവര്‍ അഭ്യര്‍ഥിച്ചു.