ബോവിക്കാനം: പയസ്വിനി പുഴയിലെ ജലസംഭരണിയില്‍ വെള്ളം വറ്റുകയും ഉപ്പിന്റെ അംശം കൂടുകയും ചെയ്തതോടെ ബാവിക്കരയില്‍നിന്നുള്ള പമ്പിങ് ജല അതോറിറ്റി നിര്‍ത്തിവച്ചു. നേരത്തേ തന്നെ പുഴയിലെ വെള്ളം ക്രമാതീതമായി താഴ്ന്നതിനാല്‍ രണ്ട് മോട്ടോറുകള്‍ ഉപയോഗിച്ച് നടത്തിയിരുന്ന പമ്പിങ് ഒരു മോട്ടോറില്‍നിന്ന് മാത്രമാക്കി ചുരുക്കിയിരുന്നു. പാണ്ടിക്കണ്ടത്തേ തടയണയില്‍ സംഭരിച്ചിരുന്ന വെള്ളം പുഴയിലൂടെ കനാല്‍ നിര്‍മിച്ച് ബാവിക്കര ജലസംഭരണിലേക്കുതുറന്നുവിട്ടിരുന്നു.
പുഴയിലെ നീരൊഴുക്ക് പൂര്‍ണമായും നിലച്ചതോടെ ഇവിടുത്തെ ജലശേഖരവും വറ്റിയിരിക്കുകയാണ്. ഇതേ തുടര്‍ന്ന് ഇന്നലെ രാവിലെ മുതലാണ് ബാവിക്കരയില്‍നിന്ന് വിദ്യാനഗറിലേക്കുള്ള പമ്പിങ് നിര്‍ത്തിവച്ചത്. ഏതാനും ദിവസങ്ങളായി കാസര്‍കോട് നഗരത്തിലെയും സമീപത്തെ അഞ്ച് പഞ്ചായത്തുകളിലെയും ഉപയോക്താക്കള്‍ക്ക് ജല അതോറിറ്റി ഉപ്പുകലര്‍ന്ന വെള്ളമാണ് വിതരണം ചെയ്തിരുന്നത്.
ജലസംഭരണിയിലേക്ക് കടല്‍ജലം കയറുന്നത് തടയാന്‍ ആലൂരില്‍ താല്‍ക്കാലിക തടയണ നിര്‍മിച്ചിട്ടുണ്ടെങ്കിലും വേലിയേറ്റ സമയത്ത് ഇതിനടിയിലൂടെയാണ് ജലസംഭരണിയിലേക്ക് ഉപ്പുവെള്ളം കയറുന്നത്.
നേരത്തേ വെള്ളത്തില്‍ ചെറിയ തോതില്‍ ഉപ്പിന്റെ അംശം ഉണ്ടായിരുന്നെങ്കിലും വെള്ളം കുറഞ്ഞതോടെ ഉപ്പിന്റെ അംശം കൂടി വരികയായിരുന്നു. കര്‍ണാടകയിലെ സുള്ള്യയിലും പരിസരങ്ങളിലും കനത്ത മഴ പെയ്താല്‍ മാത്രമേ പുഴയില്‍ നീരൊഴുക്ക് കൂടി ജലസംഭരണിയില്‍ വെള്ളമെത്തുകയുള്ളു. അതുവരെ ഇനി വെള്ളം കിട്ടുകയില്ല.
പൈപ്പ് ലൈന്‍ വഴിയിലുള്ള ജല വിതരണം നിര്‍ത്തിയതോടെ ജനം വെള്ളത്തിനായുള്ള നെട്ടോട്ടത്തിലാണ്.
കാസര്‍കോടും പരിസരങ്ങളിലുമുള്ള രൂക്ഷമായ ജലക്ഷാമം ശുചീകരണ പ്രവര്‍ത്തനങ്ങളെയും അവതാളത്തിലാക്കും.