ഗാന്ധിനഗർ: കെട്ടിടം തകർന്നുവീണ് വീട്ടമ്മയുടെ  ജീവൻ നഷ്ടമായിട്ടും മന്ത്രിമാരായ വീണാജോർജും വി.എൻ വാസവനും വിശദീകരിക്കാൻ ശ്രമിച്ചത് സർക്കാർ നടപ്പാക്കിയ വികസന പ്രവർത്തനങ്ങൾ. തലയോലപ്പറമ്പ് സ്വദേശി ബിന്ദുവിൻ്റെ ദാരുണാന്ത്യത്തിന് ശേഷം നടത്തിയ വാർത്താസമ്മേളനത്തിലാണ് ഇവരുടെ നടപടി. കെട്ടിടം ഉപയോഗശൂന്യമെന്ന് 2013 ൽ പി.ഡബ്ല്യു.ഡി. എക്സി.എൻജിനീയർ നൽകിയ റിപ്പോർട്ടുയർത്തിയായിരുന്നു മന്ത്രിമാരുടെ വിശദീകരണം.

ALSO READ: കോട്ടയം മെഡിക്കൽ കോളേജ് കെട്ടിടം തകർന്ന സംഭവം: ബലക്ഷയം നേരത്തെ ശ്രദ്ധയിൽപ്പെട്ടിരുന്നുവെന്ന് സൂപ്രണ്ട്, അപകട ഉത്തരവാദിത്തം ഏറ്റെടുത്തു

എത്രയും വേഗം ഇവിടെ പുതിയ കെട്ടിടം നിർമിക്കുകയോ ഇത് നവീകരിക്കുകയോ വേണമെന്ന റിപ്പോർട്ടിൽ യു.ഡി.എഫ്. സർക്കാർ നടപടി സ്വീകരിച്ചില്ല എന്നാണ് പരോക്ഷമായി ഇവർ പറയാൻ ശ്രമിച്ചത്. അന്ന് നടപടിയില്ലാതെ പോയ ആവശ്യത്തിന് 2016 ലാണ് ജീവൻ വച്ചത്.  ഇക്കാലമത്രയും ഇല്ലാതിരുന്ന അഗ്നിസുരക്ഷാ പരിശോധന നടത്തിയതും ഈ സർക്കാരാണ് എന്നും മന്ത്രിമാർ മാറിമാറിപ്പറഞ്ഞു. അപ്പോഴും സംഭവത്തിൽ വീഴ്ച ഉണ്ടായില്ലേ എന്ന ചോദ്യത്തിന് ഇല്ല എന്നുതന്നെ ആയിരുന്നു മന്ത്രിമാരുടെ മറുപടി.