കൊല്‍ക്കത്ത: തുടര്‍ പരാജയങ്ങള്‍ക്കു ശേഷം വിജയ വഴിയില്‍ തിരിച്ചെത്തി കൊല്‍ക്കത്ത.
തുടര്‍ച്ചയായ ആറു പരാജയങ്ങള്‍ക്കു ശേഷം മുംബൈയെ 34 റണ്‍സിന് തോല്‍പിച്ചാണ് കൊല്‍ക്കത്ത ശക്തമായി തിരിച്ചെത്തിയത്. ടോസ് നേടിയ മുംബൈ കൊല്‍ക്കത്തയെ ബാറ്റിങ്ങിനയക്കുകയായിരുന്നു. ക്യാപ്റ്റന്‍ രോഹിത് ശര്‍മയുടെ തീരുമാനം തെറ്റിയെന്ന് തെളിയിക്കുന്ന രീതിയിലായിരുന്നു നൈറ്റ് റൈഡേഴ്‌സിന്റെ ബാറ്റിങ്. മുംബൈ ബൗളര്‍മാരെ ഒരു ദാക്ഷിണ്യവുമില്ലാതെ നൈറ്റ് റൈഡേഴ്‌സ് ബാറ്റ്‌സ്മാന്‍മാര്‍ തകര്‍ത്തടിച്ചപ്പോള്‍ രണ്ട് വിക്കറ്റ് നഷ്ടത്തില്‍ കൊല്‍ക്കത്ത 232 റണ്‍സ് നേടി. കൊല്‍ക്കത്തയ്ക്കു വേണ്ടി ഗില്ലും ലിന്നും റസലും അര്‍ധ സെഞ്ചുറി നേടി. 40 പന്തില്‍ 80 റണ്‍സുമായി പുറത്താകാതെ നിന്ന റസലാണ് ടോപ്‌സ്‌കോറര്‍. എട്ട് സിക്‌സും ആറു ഫോറും അടങ്ങുന്നതാണ് റസലിന്റെ ഇന്നിങ്‌സ്. ശുഭ്മാന്‍ ഗില്‍ 76(45), ക്രിസ് ലിന്‍ 54(29) എന്നിവര്‍ മികച്ച പ്രകടനം നടത്തി.മറുപടി ബാറ്റിങ്ങിനിറങ്ങിയ മുംബൈക്ക് ഏഴു വിക്കറ്റ് നഷ്ടത്തില്‍ 198 റണ്‍സ് എടുക്കാനെ സാധിച്ചുള്ളു.റണ്‍സൊന്നുമെടുക്കാതെ ഡികോക്കും 12 റണ്‍സുമായി രോഹിതും നേരത്തെ മടങ്ങി. ഒരു വന്‍ പരാജയം മുന്നില്‍ക്കണ്ട മുംബൈയെ വീണ്ടും കളിയിലേക്കു കൊണ്ടുവന്നത് ഹാര്‍ദിക് പാണ്ഡ്യയുടെ ഒറ്റയാള്‍ പോരാട്ടമാണ്. 34 പന്തില്‍ 91 റണ്‍സ് നേടിയ പാണ്ഡ്യ പുറത്തായതു കൂടി മുംബൈയുടെ വിജയപ്രതീക്ഷയും അസ്തമിച്ചു. ഒന്‍പതു സിക്‌സും ആറ് ഫോറും ഉള്‍പ്പെടുന്നതാണ് പാണ്ഡ്യയുടെ ഇന്നിങ്‌സ്. ജയത്തോടു കൂടി കൊല്‍ക്കത്ത പ്ലേ ഓഫ് സാധ്യതകള്‍ സജീവമാക്കി.