ചേവായൂര്‍: പട്ടാപ്പകല്‍ റോഡില്‍ വച്ച് ഭാര്യയുടെ ദേഹത്ത് പെട്രോള്‍ ഒഴിച്ച് തീ കൊളുത്തി കൊല്ലാന്‍ ശ്രമിച്ച സംഭവത്തില്‍ ഭര്‍ത്താവിനെ പൊലിസ് അറസ്റ്റ് ചെയ്തു. മെഡിക്കല്‍ കോളജ് ചെറുകുന്നത്ത് ഷനോദി (45)നെയാണ് ചേവായൂര്‍ പൊലിസ് അറസ്റ്റ് ചെയ്തത്. ചേവായൂര്‍ പൊലിസ് സ്റ്റേഷന് സമീപം ലീലാ തിയറ്റര്‍ റോഡില്‍ കഴിഞ്ഞ ദിവസമാണ് സംഭവം.

മെഡിക്കല്‍ കോളജിലെ നഴ്‌സിങ് അസിസ്റ്റന്റായ കണ്ണൂര്‍ പട്ടുവം സ്വദേശി രമയെയാണ് ഭര്‍ത്താവ് കൊല്ലാന്‍ ശ്രമിച്ചതായി പരാതിയുള്ളത്. ആശുപത്രിയിലെ ജോലി കഴിഞ്ഞ് രാവിലെ എട്ടുമണിയോടെ എന്‍.ജി.ഒ ക്വാര്‍ട്ടേഴ്‌സിലെ ഹോസ്റ്റലിലേക്ക് വരികയായിരുന്ന രമയുടെ ദേഹത്ത് പിന്നിലൂടെ എത്തിയ ഭര്‍ത്താവ് പെട്രോള്‍ ഒഴിക്കുകയായിരുന്നു. തീകൊളുത്താന്‍ ശ്രമിച്ചപ്പോള്‍ തൊട്ടടുത്ത വീട്ടില്‍ ഓടിക്കയറുകയായിരുന്നെന്ന് രമ പരാതിയില്‍ പറയുന്നു. ഷനോദിനെതിരേ വധശ്രമത്തിനാണ് പൊലിസ് കേസെടുത്തത്. ഭര്‍ത്താവുമായി അകന്ന് കഴിയുന്ന രമ കണ്ണൂര്‍ കുടുംബകോടതിയില്‍ വിവാഹ മോചനത്തിന് ഹരജി നല്‍കിയതിലുള്ള വൈരാഗ്യമാണ് സംഭവത്തിന് പിന്നിലെന്ന് പൊലിസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.