പറവൂര്‍: രാജ്യസഭാ പ്രതിപക്ഷ നേതാവും മുതിര്‍ന്ന കോണ്‍ഗ്രസ് നേതാവുമായ ഗുലാം നബി ആസാദ് ചേന്ദമംഗലം പഞ്ചായത്തിലെ ചാത്തേടം, കുറുമ്പത്തൂരുത്ത് പ്രദേശങ്ങള്‍ സന്ദര്‍ശിച്ചു. ജനങ്ങളോട് വെള്ളപ്പൊക്ക കെടുതികളെക്കുറിച്ച് ചോദിച്ചറിഞ്ഞ അദ്ദേഹം അര്‍ഹമായ നഷ്ടപരിഹാരത്തിനായി കേന്ദ്ര സര്‍ക്കാരില്‍ സമ്മര്‍ദ്ദം ചെലുത്തുമെന്ന് ഉറപ്പ് നല്‍കി. വി.ഡി സതീശന്‍ എം.എല്‍.എ, മുന്‍ എം.പി കെ.പി ധനപാലന്‍, ഡി.സി.സി പ്രസിഡന്റ് ടി.ജെ വിനോദ്, എം.ടി ജയന്‍, പി.ആര്‍ സൈജന്‍, ഫ്രാന്‍സിസ് വലിയപറമ്പില്‍, ഷിബു ചേരാമന്‍തുരുത്തി തുടങ്ങിയവരും ഗുലാം നബിയോടൊപ്പം ഉണ്ടായിരുന്നു.
നെടുമ്പാശ്ശേരി: വെള്ളപ്പൊക്കം വ്യാപക ദുരന്തം വിതച്ച കുന്നുകര പഞ്ചായത്തിലും ഗുലാം നബി ആസാദും എത്തി. പഞ്ചായത്തില്‍ പ്രളയം തകര്‍ത്ത പ്രദേശങ്ങളില്‍ അദ്ദേഹം പര്യടനം നടത്തി. ഇന്നലെ വൈകീട്ട് 3.45ന് വയല്‍കരയിലെ കാരയ്ക്കാതുരുത്തിലെത്തിയ ഗുലാം നബി ആസാദ് വെള്ളപ്പൊക്കത്തെ തുടര്‍ന്ന് പൂര്‍ണമായും തകര്‍ന്നടിഞ്ഞ ചെന്നാര കാര്‍ത്തികേയന്റെ വീട് സന്ദര്‍ശിച്ചു. പിന്നീട് ദുരിതാശ്വാസ ക്യാംപ് തകര്‍ന്ന് ആറ് പേര്‍ മരണമടഞ്ഞ കുത്തിയതോട് സെന്റ് സേവ്യേഴ്‌സ് പള്ളിയിലും ഗുലാം നബി ആസാദ് എത്തി. വി.ഡി സതീശന്‍ എം.എല്‍.എ, ഗ്രാമ പഞ്ചായത്ത് പ്രസിഡന്റ് ഫ്രാന്‍സിസ് തറയില്‍, വികാരി ഫാ.വര്‍ഗ്ഗീസ് എന്നിവര്‍ രാജ്യസഭാ പ്രതിപക്ഷ നേതാവിന് സംഭവങ്ങള്‍ വിവരിച്ചു നല്‍കി.
ഗ്രാമ പഞ്ചായത്തിന്റെ സ്ഥിതിഗതികള്‍ വിവരിച്ച് മണ്ഡലം കോണ്‍ഗ്രസ് കമ്മിറ്റിയുടെ നിവേദനം പ്രസിഡന്റ് എം.എ.അബ്ദുള്‍ ജബ്ബാര്‍ അദ്ധേഹത്തിന് കൈമാറി.ഡി.സി.സി പ്രസിഡന്റ് ടി.ജെ.വിനോദ്, വൈസ് പ്രസിഡന്റ് മുഹമ്മദ് ഷിയാസ്, ജനറല്‍ സെക്രട്ടറിമാരായ എം.ടി.ജയന്‍, ഐ.കെ.രാജു, ജോസഫ് ആന്റണി, ബ്ലോക്ക് പഞ്ചായത്ത് പ്രസിഡന്റ് ബിന്ദു സെബാസ്റ്റ്യന്‍, അംഗം രഞ്ജിനി അംബുജാക്ഷന്‍, സി.യു.ജബ്ബാര്‍,ഷിജി പ്രിന്‍സ്, എം.എ.സുധീര്‍, പി.പി.സെബാസ്റ്റ്യന്‍, നവാസ് മാഞ്ഞാലി തുടങ്ങിയവരും സന്നിഹിതരായിരുന്നു.