കണ്ണൂര്‍: തുള്ളിമരുന്നുപയോഗിച്ചുള്ള ചികിത്സയിലൂടെ കുട്ടികളുടെ അന്ധത ഗണ്യമായി കുറക്കാന്‍ സാധിക്കുമെന്ന് വിദഗ്ധര്‍. നേത്രരോഗ വിദഗ്ധരുടെയും പാരാമെഡിക്കല്‍ ജീവനക്കാരുടെയും സംസ്ഥാനതല സിംപോസിയത്തിലാണ് വിഷയം ചര്‍ച്ചയായത്.
കായികമായ കളികളില്‍ കൂടി കുട്ടികളിലെ മയോപ്പിയ കുറയ്ക്കാന്‍ സാധിക്കുമെന്നും അവര്‍ അഭിപ്രായപ്പെട്ടു.
കേരള സൊസൈറ്റി ഓഫ് ഒഫ്താല്‍മിക് സര്‍ജന്‍സ്(കെ.എസ്.ഒ.എസ്), ഒഫ്താല്‍മിക് സൊസൈറ്റി ഓഫ് കണ്ണൂര്‍(ഒ.എസ.്‌കെ), ഐ.എം.എ തലശേരി, കോംട്രസ്റ്റ് ചാരിറ്റബിള്‍ ട്രസ്റ്റ് ഐ ഹോസ്പിറ്റല്‍ എന്നിവയുടെ നേതൃത്വത്തിലാണ് സിംപോസിയം നടന്നത്. കെ.എസ്.ഒ.എസ്. സംസ്ഥാന പ്രസിഡന്റ് ഡോ. രാധാ രമണന്‍ ഉദ്ഘാടനം ചെയ്തു.
ഗ്ലോക്കോമ, റെറ്റിന, കുട്ടികളിലെ നേത്രരോഗങ്ങള്‍, തിമിര ശസ്ത്രക്രിയ. പ്ലാസ്റ്റിക് സര്‍ജറി, ഓപ്പറേഷന്‍ തിയറ്ററിലെ അണുവിമുക്തികരണം തുടങ്ങിയ വിഷയങ്ങളില്‍ പ്രബന്ധങ്ങള്‍ അവതരിപ്പിച്ചു.
കെ.എസ്.ഒ.എസ് സംസ്ഥാന ജനറല്‍ സെക്രട്ടറി ഡോ. ശ്രീനി എടക്ലോണ്‍ അധ്യക്ഷനായി.