ന്യൂഡല്‍ഹി: മുതിര്‍ന്ന അഭിഭാഷകരായ ഇന്ദിരാ ജയ്‌സിങ്, ആനന്ദ് ഗ്രോവര്‍, സന്നദ്ധ സംഘടനയായ ലോയേഴ്‌സ് കലക്ടീവ് എന്നിവയ്‌ക്കെതിരേ അന്വേഷണത്തിനുത്തരവിടണമെന്നാവശ്യപ്പെട്ട് ലോയേഴ്‌സ് വോയ്‌സ് എന്ന സന്നദ്ധ സംഘടന നല്‍കിയ പൊതുതാല്‍പര്യ ഹരജിയില്‍ ചീഫ് ജസ്റ്റിസ് രഞ്ജന്‍ ഗൊഗോയ്, ജസ്റ്റിസ് ദീപക് ഗുപ്ത എന്നിവരടങ്ങിയ സുപ്രിംകോടതി ബെഞ്ച് അഭിഭാഷകര്‍ക്കും ലോയേഴ്‌സ് കലക്്ടീവിനും നോട്ടിസയച്ചു. രണ്ട് അഭിഭാഷകര്‍ക്കുമെതിരേ അഴിമതി നിരോധന നിയമം, കള്ളപ്പണം വെളുപ്പിക്കല്‍ നിരോധന നിയമം, ആദായനികുതി വകുപ്പ് നിയമം എന്നിവ പ്രകാരം കേസെടുക്കണമെന്നാണ് ഹരജിയിലെ ആവശ്യം. ഇന്ദിരാ ജയ്‌സിങും ഭര്‍ത്താവ് ആനന്ദ് ഗ്രോവറും ചേര്‍ന്നു നടത്തുന്ന സന്നദ്ധ സംഘടനയാണ് ലോയേഴ്‌സ് കലക്ടീവ്.

ചീഫ് ജസ്റ്റിസ് രഞ്ജന്‍ ഗൊഗോയിക്കെതിരായ ലൈംഗികാരോപണത്തില്‍ സ്വീകരിച്ച നിലപാടു കാരണം തങ്ങളെ ഇരകളാക്കുകയാണെന്ന് നോട്ടിസിന് പിന്നാലെ ഇന്ദിരാ ജയ്‌സിങ്, ആനന്ദ് ഗ്രോവര്‍ എന്നിവര്‍ പുറത്തിറക്കിയ വാര്‍ത്താക്കുറിപ്പില്‍ ആരോപിച്ചു. രജിസ്ട്രി രേഖപ്രകാരം ഈ മാസം ആറിന് 3.19നാണ് പൊതുതാല്‍പര്യ ഹരജി ഫയല്‍ ചെയ്യുന്നത്. പിഴവുകളുള്ളതിനാല്‍ ഏഴിന് പിന്‍വലിച്ചു.

ഏഴിന് മെന്‍ഷനിങ് പോലുമില്ലാതെ വീണ്ടും പ്രത്യക്ഷപ്പെടുകയും എട്ടിന് ഒന്നാം നമ്പര്‍ കോടതിയില്‍ ലിസ്റ്റ് ചെയ്യപ്പെടുകയും ചെയ്തു. പുതിയ കേസുകള്‍ വേനലവധി കഴിഞ്ഞ് മാത്രമേ പരിഗണിക്കൂ എന്ന കോടതി സര്‍ക്കുലറുണ്ടായിട്ടും കേസ് വേഗത്തില്‍ കോടതി പരിഗണിച്ചു. ഹരജിക്കാരുടെ അഭിഭാഷകന്‍ ഉത്തരവ് പുറപ്പെടുവിക്കണമെന്നാവശ്യപ്പെടാതിരുന്നിട്ടും കോടതി സ്വമേധയാ ഉത്തരവിടുകയായിരുന്നുവെന്നും വാര്‍ത്താകുറിപ്പില്‍ ആരോപിക്കുന്നു.