തിരുന്നാവായ: ഭാരതപ്പുഴയില്‍ ജലനിരപ്പ് കുറഞ്ഞതോടെ മണല്‍ക്കടത്ത് വ്യാപകമായി. പുഴയോര പഞ്ചായത്തുകളിലെ കടവുകള്‍ കേന്ദ്രീകരിച്ചാണ് മണല്‍ മാഫിയാ സംഘങ്ങള്‍ വീണ്ടും സജീവമായത്. പ്രളയ സമയത്ത് ഇരു കരയും നിറഞ്ഞ് ഒഴുകിയിരുന്ന പുഴയില്‍നിന്ന് വെള്ളം ഉള്‍വലിഞ്ഞതോടെ മണല്‍ത്തിട്ടകള്‍ വ്യാപകമായി രൂപംകൊണ്ടിട്ടുണ്ട്.
കഴിഞ്ഞ ഒരാഴ്ചക്കിടെ ആയിക്കണക്കിന് ടണ്‍ മണലാണ് ഭാരതപ്പുഴയുടെ തീരങ്ങളില്‍ നിന്നും പൊലിസ് പിടിച്ചെടുത്തത്.
ഇതര സംസ്ഥാന തൊഴിലാളികളെ ഉപയോഗിച്ച് പുഴയില്‍നിന്നും മുങ്ങിയെടുക്കുന്ന മണല്‍ വഞ്ചിയിലാക്കി കരയിലെത്തിക്കുകയാണ്.
തുടര്‍ന്ന് ഇവരെ ഉപയോഗിച്ച് പ്ലാസ്റ്റിക് ചാക്കുകളില്‍ മണല്‍ നിറച്ചുവയ്ക്കുകയും ചെയ്യുന്നു. പ്രളയവുമായി ബന്ധപ്പെട്ട തിരക്കിലായതിനാല്‍ റവന്യു ഉദ്യോഗസ്ഥര്‍ നടത്തിയിരുന്ന പരിശോധന ഇല്ലാതായത് മാഫിയാ സംഘങ്ങള്‍ക്ക് കൂടുതല്‍ പ്രചോദനമാകുന്നു.