കാസര്‍കോട്: ഏഴിമല നാവിക അക്കാദമിക്ക് സമീപത്തെ പയ്യന്നൂര്‍ എട്ടിക്കുളം ഗവ. മാപ്പിള യു.പി സ്‌കൂളിന് സ്വന്തമായി കെട്ടിടം നിര്‍മിക്കാന്‍ നടപടിയായതായി ഫിഷറീസ് വകുപ്പ് ഡയറക്ടര്‍ അറിയിച്ചിട്ടുണ്ടെന്ന് ന്യൂനപക്ഷകമ്മിഷന്‍ അംഗം അഡ്വ. മുഹമ്മദ് ഫൈസല്‍ അറിയിച്ചു. കലക്ടറേറ്റ് കോണ്‍ഫറണ്‍സ് ഹാളില്‍ നടന്ന കമ്മിഷന്‍ സിറ്റിങ്ങിലാണ് അദ്ദേഹം ഇക്കാര്യം അറിയിച്ചത്.
80 വര്‍ഷത്തോളമായി വാടക കെടിടത്തിലാണ് ഈ വിദ്യാലയം പ്രവര്‍ത്തിച്ചുവരുന്നത്. തീരദേശമേഖലയായതിനാല്‍ മത്സ്യതൊഴിലാളികളുടെയും സാധാരണക്കാരുടെയും ഏക ആശ്രയമായിരുന്ന ഈ വിദ്യാലയം. ഒരു പരാതിയെ തുടര്‍ന്ന് സ്വന്തമായകെട്ടിടത്തിന് ഏറെ നാളായി കമ്മിഷന്‍ പ്രയത്‌നിച്ചു വരികയായിരുന്നെന്ന് അദ്ദേഹം പറഞ്ഞു.
ആകെ 17 കേസുകളാണ് കമ്മിഷന്‍ സിറ്റിങ്ങില്‍ പരിഗണനയ്ക്ക് വന്നത്. പ്രധാനമന്ത്രിയുടെ ഐ.ഡി.എം.ഐ പദ്ധതി പ്രകാരമുളള രണ്ടാം ഗഡു തുക ലഭിച്ചില്ലെന്ന ജില്ലയിലെ വിവിധ ന്യൂനപക്ഷവിദ്യാലയങ്ങളുടെ പരാധിയില്‍ സര്‍ക്കാരിന്റെ വിശദീകരണം തേടും.
വീടിന്റെ പ്ലാന്‍ അംഗീകരിച്ചു കിട്ടാത്തത് സംബന്ധിച്ച് മൊഗ്രാല്‍ പുത്തൂര്‍ സ്വദേശിയുടെ പരാ തിയില്‍ ജില്ലാ കളക്ടര്‍, കുമ്പള പഞ്ചായത്ത് സെക്രട്ടറി എന്നിവരുടെ റിപ്പോര്‍ട്ട് തേടാനും കമ്മീഷന്‍ തീരുമാനിച്ചു.