ന്യൂഡല്‍ഹി: ചീഫ് ജസ്റ്റിസ് രഞ്ജന്‍ ഗൊഗോയിക്കെതിരേയുള്ള പീഡന ആരോപണങ്ങളുമായി ബന്ധപ്പെട്ട് അറ്റോര്‍ണി ജനറല്‍ കെ.കെ വേണുഗോപാലും കേന്ദ്രവും തമ്മിലുള്ള ബന്ധം വഷളാകുന്നു.
പീഡന പരാതിയില്‍ സര്‍ക്കാര്‍ ഇടപെടാന്‍ മടിച്ചത് ഉള്‍പ്പെടെയുള്ള വിഷയങ്ങളാണ് തര്‍ക്കത്തിന് കാരണമായത്. ഇതിനെ തുടര്‍ന്ന് അറ്റോര്‍ണി ജനറല്‍ (എ.ജി) രാജിവയ്ക്കാന്‍ ഒരുങ്ങുകയാണെന്ന് ഓണ്‍ലൈന്‍ പോര്‍ട്ടലായ ദ വയര്‍ റിപ്പോര്‍ട്ട് ചെയ്തു.
പീഡന പരാതി അന്വേഷിക്കുന്ന സമിതിയിലേക്ക് സുപ്രിംകോടതിയില്‍ നിന്ന് പുറത്തുള്ളയാളെ ഉള്‍ക്കൊള്ളിക്കണമെന്ന് ആവശ്യപ്പെട്ട് എ.ജി മുഴുവന്‍ സുപ്രിംകോടതി ജഡ്ജിമാര്‍ക്കും ഒരാഴ്ച മുന്‍പ് കത്തയിച്ചിരുന്നു. ചീഫ് ജസ്റ്റിസിനെ അനുകൂലിച്ച് സോളിസിറ്റര്‍ ജനറല്‍ തുഷാര്‍ മേത്ത രംഗത്തെത്തിയ സമയത്തായിരുന്നു എ.ജിയുടെ നീക്കം. എന്നാല്‍ എ.ജിയുടെ നിലാപടില്‍ അതൃപ്തി അറിയിച്ച കേന്ദ്രം, അഭിപ്രായം വ്യക്തിപരമാണെന്ന് അറിയിച്ച് ജഡ്ജിമാര്‍ക്ക് കത്തയക്കാന്‍ അദ്ദേഹത്തോട് ആവശ്യപ്പെടുകയായിരുന്നു. ഇതിനെ തുടര്‍ന്ന് സര്‍ക്കാരിന്റെ അഭിപ്രായമല്ല താന്‍ അറിയിച്ചതെന്നും വ്യക്തിപരമായ നിലപാടാണെന്നും വ്യക്തമാക്കി അറ്റോര്‍ണി ജനറല്‍ മുഴുവന്‍ ജഡ്ജിമാര്‍ക്കും വീണ്ടും കത്തയച്ചു.
കേന്ദ്ര സര്‍ക്കാരുമായുള്ള ഈ അഭിപ്രായ ഭിന്നത കാരണമാണ് അറ്റോര്‍ണി ജനറല്‍ രാജിവയ്ക്കാന്‍ ഒരുങ്ങുന്നതെന്നാണ് സൂചന.