വേങ്ങര: വാര്‍ഡ് അംഗം രാജിവച്ചതെ തുടര്‍ന്ന് ഉപതെരഞ്ഞെടുപ്പ് നടക്കുന്ന കണ്ണമംഗലം ഗ്രാമ പഞ്ചായത്ത് ഒന്നാം വാര്‍ഡ് ചെങ്ങാനിയില്‍ 17 ന് വോട്ടര്‍മാര്‍ ബൂത്തിലെത്തും.
നാമനിര്‍ദേശ പത്രികകളുടെ സൂക്ഷ്മ പരിശോധനക്കു ശേഷം അഞ്ചു പേര്‍ മത്സര രംഗത്തുണ്ട്. ആബിദ പളളിയാളി (യു.ഡി.എഫ്), പ്രിയ ചെറിയോടന്‍ (എല്‍.ഡി.എഫ്), രാധ, ആബിദ അബ്ദുറസാഖ്, ആബിദ ശാരത്ത് എന്നിവര്‍ സ്വതന്ത്ര സ്ഥാനാര്‍ഥികളുമാണ്. 20 വാര്‍ഡുകളുളള കണ്ണമംഗലത്ത് മുസ്‌ലിം ലീഗ്, കോണ്‍ഗ്രസ്, സി.പി.എം മുന്നണികള്‍ തമ്മില്‍ മത്സരിച്ച 2015 ലെ തെരഞ്ഞെടുപ്പില്‍ ലീഗ് മുന്നണി 11 വാര്‍ഡുകളും കോണ്‍ഗ്രസ് മുന്നണി 9 വാര്‍ഡുകളും നേടിയിരുന്നു. യു.ഡി.എഫ് ജില്ലാ നേതൃത്വത്തിന്റെ ചര്‍ച്ചകള്‍ക്കു ശേഷം പഞ്ചായത്തില്‍ യു.ഡി.എഫ് സംവിധാനം പുനസ്ഥാപിക്കുകയും തെരഞ്ഞെടുപ്പില്‍ ഒന്നിച്ച് നില്‍ക്കുവാനും തീരുമാനമെടുക്കുകയും ചെയ്തു. ഇതോടെ എല്‍.ഡി.എഫ് നാലു വാര്‍ഡുകളിലേക്കു ചുരുങ്ങി. ഇന്നലെ നടന്ന കണ്‍വന്‍ഷന്‍ പി.കെ കുഞ്ഞാലിക്കുട്ടി ഉദ്ഘാടനം ചെയ്തു. ഡി.സി.സി പ്രസിഡന്റ് വി.വി പ്രകാശ് സംബന്ധിച്ചു.
അതേസമയം, യു.ഡി.എഫ് സ്ഥാനാര്‍ഥിയുടെ രണ്ട് അപരകള്‍ സ്വതന്ത്രരായി രംഗത്ത് എത്തിയത് പുതിയ പ്രതിസന്ധിക്കു വഴിഒരുക്കിയിട്ടുണ്ട്.