നെടുമ്പാശ്ശേരി: കോളജില്‍ നിന്നും വീട്ടിലേക്കുള്ള യാത്രക്കിടെ പിതാവിന്റെ ഓട്ടോറിക്ഷയില്‍ നിന്നും കാണാതായ ബിരുദ വിദ്യാര്‍ഥിനി പൊലിസ് സ്റ്റേഷനില്‍ ഹാജരായത് വിവാഹം കഴിഞ്ഞ ശേഷം യുവാവായ വരനോടൊപ്പം. വെള്ളിയാഴ്ച്ച വൈകിട്ടാണ് വിദ്യാര്‍ഥിനി കാലടിയിലെ കോളേജില്‍ നിന്നും ആവണംകോട്ടെ വീട്ടിലേക്ക് മടങ്ങും വഴി കരിയാട് കവലയില്‍ ബസിറങ്ങിയ ശേഷം പിതാവിന്റെ ഓട്ടോറിക്ഷയില്‍ കയറിയത്.ഇതിനിടെ ഒരു സുഹൃത്തിനെ കണ്ട പിതാവ് ഓട്ടോ നിര്‍ത്തി അല്‍പസമയം മാറി നിന്ന് സംസാരിച്ചു. ഇതിനു ശേഷം ഓട്ടോറിക്ഷയില്‍ മടങ്ങിയെത്തിയപ്പോള്‍ മകളെ കാണാനില്ലായിരുന്നു.
തുടര്‍ന്ന് നടത്തിയ അന്വേഷണത്തില്‍ ബൈക്കിലെത്തിയ യുവാവിനൊപ്പമാണ് പെണ്‍കുട്ടി പോയതെന്ന് വ്യക്തമായി.പിന്നീട് പിതാവ് നെടുമ്പാശ്ശേരി പൊലിസില്‍ നല്‍കിയ പരാതിയില്‍ മിസിംഗ് കേസ് രജിസ്റ്റര്‍ ചെയ്ത് അന്വേഷണം നടക്കുന്നതിനിടെയാണ് ഇന്നലെ വൈകിട്ട് യുവതി യുവാവിനോടും ബന്ധുക്കളോടുമൊപ്പം പൊലിസ് സ്റ്റേഷനില്‍ ഹാജരായത്.ഇന്നലെ രാവിലെ സമീപത്തെ ഒരു ക്ഷേത്രത്തില്‍ വച്ച് ഇരുവരുടെയും വിവാഹം നടത്തിയ ശേഷമാണ് ഇവര്‍ പൊലിസ്  സ്റ്റേഷനില്‍ എത്തിയത്. എന്നാല്‍ കേസ് രജിസ്റ്റര്‍ ചെയ്ത സാഹചര്യത്തില്‍ യുവതിയെ കോടതിയില്‍ ഹാജരാക്കുമെന്ന് നെടുമ്പാശ്ശേരി എസ്.ഐ സോണി മത്തായി പറഞ്ഞു.