ഈ വര്‍ഷത്തെ സര്‍ട്ടിഫിക്കറ്റുകള്‍
ജൂലൈ 15 മുതല്‍

മലപ്പുറം: സര്‍ട്ടിഫിക്കറ്റുകള്‍ എവിടെ നിന്നും ലഭ്യമാക്കുന്ന സംവിധാനത്തിന്റെ ഭാഗമായി കഴിഞ്ഞ വര്‍ഷം എസ്.എസ്.എല്‍.സി വിജയിച്ചവരുടെ ഡിജിറ്റല്‍ സര്‍ട്ടിഫിക്കറ്റുകള്‍ ഡിജി ലോക്കറില്‍ ലഭ്യമായി തുടങ്ങി. സംസ്ഥാന പൊതുവിദ്യാഭ്യാസ വകുപ്പിനു കീഴിലെ പരീക്ഷാ ഭവനു കീഴിലാണ് ഡിജി ലോക്കര്‍ സംവിധാനം ആരംഭിച്ചത്.

പ്രളയക്കെടുതി, എസ്.എസ്.എല്‍.സി സര്‍ട്ടിഫിക്കറ്റിലെ എഴുത്തുകള്‍ മാഞ്ഞുപോവല്‍ തുടങ്ങിയ കാരണങ്ങള്‍ കൊണ്ട് വിദ്യാര്‍ഥികള്‍ ഏറെ ബുദ്ധിമുട്ടുന്നതായി നേരത്തെ സുപ്രഭാതം റിപ്പോര്‍ട്ട് ചെയ്്തിരുന്നു. ഇതിനു പിന്നാലെ ഈ വര്‍ഷം ഡിജിറ്റല്‍ സര്‍ട്ടിഫിക്കറ്റുകള്‍ ലഭ്യമാകുമെന്നതിനുള്ള നടപടി തുടങ്ങിയതായും സുപ്രഭാതം റിപ്പോര്‍ട്ട് ചെയ്തിരുന്നു. സംസ്ഥാന ഐ.ടി മിഷന്‍, ഇ- മിഷന്‍, ദേശീയ ഇ- ഗവേണന്‍സ് ഡിവിഷന്‍ എന്നിവരുടെ സഹകരണത്തോടെയാണ് ഈ സംവിധാനം നിലവില്‍ വന്നിരിക്കുന്നത്്. ഈ വര്‍ഷത്തെ എസ്.എസ്.എല്‍.സി സര്‍ട്ടിഫിക്കറ്റുകള്‍ ജൂലൈ 15 മുതല്‍ ഈ സംവിധാനം വഴി ലഭ്യമാവും. ഡിജി ലോക്കറിലെ സര്‍ട്ടിഫിക്കറ്റുകള്‍ ആധികാരിക രേഖയായി ഉപയോഗിക്കാവുന്ന തരത്തിലാണ് ലഭ്യമാക്കിയിരിക്കുന്നത്്.