മക്ക: വിശുദ്ധ ഉംറ നിര്‍വ്വഹിക്കാനെത്തുന്നവര്‍ക്ക് ഇ-വള തയ്യാറാകുന്നു. തീര്‍ത്ഥാടകരുടെ നീക്കവും മറ്റു കാര്യങ്ങളും നേരിട്ട് അറിയാവുന്ന തരത്തില്‍ ജി പി എസ് സംവിധാനത്തോടെയാണ് ഇ ബ്രെസ്‌ലേറ്റ് തയ്യാറാക്കുന്നതെന്ന് നാഷണല്‍ ഹജ്ജ് ആന്‍ഡ് ഉംറ കമ്മിറ്റി സി ഇ ഒ മുഹമ്മദ് ബിന്‍ ബാദി പറഞ്ഞു. തങ്ങളുടെ ഇത്തരം ആവശ്യങ്ങള്‍ ഉള്‍പ്പെടുത്തി വാച്ച് നിര്‍മ്മിക്കാന്‍ ചൈനീസ് കമ്പനികളുമായി ചര്‍ച്ചകള്‍ നടത്തി വരികയാണെന്നും അദ്ദേഹം കൂട്ടിച്ചേര്‍ത്തു.

ജി പി എസ് സംവിധാനമടക്കമുള്ള വിവിധ സൗകര്യങ്ങള്‍ ഉള്‍കൊള്ളുന്ന ബ്രെസ്‌ലെറ്റില്‍ തീര്‍ത്ഥാടകന്റെ പ്രാഥമിക വിവരങ്ങള്‍, താമസ കേന്ദ്രം, മാപ്പ്, തുടങ്ങി ഉള്‍കൊള്ളുന്നതായിരിക്കും. വിവിധ സ്ഥലങ്ങളിയില്‍ വെച്ച് വഴിയറിയാതെ കുടുങ്ങുകയോ മറ്റോ ആയാല്‍ താമസ സ്ഥലങ്ങളിലെക്ക് എത്തിച്ചേരാനും അടിയന്തിര ഘട്ടങ്ങളില്‍ ഇവരുടെ സ്ഥലങ്ങള്‍ കണ്ടെത്താനായും സഹായിക്കുന്നതാണ് ഇതില്‍ ഉള്‍ക്കൊള്ളുന്ന ജി പി എസ് സംവിധാനം.

കൂടാതെ, ഇരുപുണ്യ നഗരികളായ മക്ക, മദീന എന്നിവിടങ്ങളിലെ ആശുപത്രികള്‍, മെഡിക്കല്‍ കേന്ദ്രങ്ങള്‍, പ്രധാന കേന്ദ്രങ്ങള്‍ എന്നിവയിലേക്കുള്ള വഴികളും ജി പി എസ് സംവിധാനം ഉപയോഗിച്ച് കണ്ടെത്താനാകും. ഈ വാച്ച് ഉപയോഗിച്ച് സഊദി അടിയന്തിര നമ്പറിലേക്ക് ബന്ധപ്പെടാനും കഴിയുമെന്നതിനാല്‍ ഏത് അടിയന്തിര ഘട്ടങ്ങളിലും സഹായകരമായി ഇത് ഉപയോഗിക്കാന്‍ സാധ്യമെന്നും അദ്ദേഹം കൂട്ടി ചേര്‍ത്തു. നിസ്‌കാര സമയങ്ങള്‍, ഖിബ്‌ല ദിശ എന്നിവയും ഉള്‍കൊള്ളുന്നതിനാല്‍ ഏത് സ്ഥലത്ത് വെച്ചും യഥാ സമയം പ്രാര്‍ത്ഥനകള്‍ നടത്താനും ഇത് ഉപയോഗമാകും.

തീര്‍ത്ഥാടകരുടെ ലഗ്ഗേജ് സംബന്ധമായ പരിഹരിക്കുന്നതിന് പുതിയ സംവിധാനം കൂടി നടപ്പിലാക്കുമെന്നും അദ്ദേഹം പറഞ്ഞു. അതിനായി പ്രത്യേകം കമ്പനികള്‍ രൂപീകരിക്കാനാണ് പദ്ധതി. തീര്‍ത്ഥാടകര്‍ വിമാനമിറങ്ങിയ കേന്ദ്രത്തില്‍ നിന്നും ലഗേസുകള്‍ സ്വീകരിച്ചു താമസ സ്ഥലത്തേക്ക് എത്തിച്ചു കൊടുക്കുന്ന പദ്ധതിയാണ് നടപ്പിലാക്കാന്‍ ഉദ്ദേശിക്കുന്നത്. ഉംറ തീര്‍ത്ഥാടകരുടെ സേവനങ്ങള്‍ മെച്ചപ്പെടുത്താന്‍ ഷെയര്‍ സംവിധാനത്തില്‍ കമ്പനി രൂപീകരിക്കാനും സഊദി നാഷണല്‍ ഹജ്ജ് ആന്‍ഡ് ഉംറ കമ്മിറ്റിക്ക് പദ്ധതിയുണ്ട്.