മഞ്ചേരി: മഞ്ചേരി മെഡിക്കല്‍ കോളജ് ആശുപത്രി അധികൃതര്‍ പൂര്‍ണ ഗര്‍ഭിണിക്ക് ചികിത്സ നിഷേധിച്ചതിനെ തുടര്‍ന്ന് ഇരട്ട ഗര്‍ഭസ്ഥശിശുക്കള്‍ മരിക്കാനിടയായ സംഭവത്തില്‍ കുഞ്ഞുങ്ങളുടെ പിതാവും സുപ്രഭാതം ലേഖകനുമായ എന്‍.സി ഷെരീഫില്‍ നിന്നും മലപ്പുറം എസ്.പി വിവരങ്ങള്‍ ശേഖരിച്ചു. മലപ്പുറം എസ്.പി യു.അബ്ദുല്‍കരീമിനു വേണ്ടി കൊണ്ടോട്ടി എസ്.ഐ രാധാകൃഷ്ണന്‍ കോഴിക്കോട് മെഡിക്കല്‍ കോളജിലെത്തിയാണ് വിവര ശേഖരണം നടത്തിയത്.
ഹൈക്കോടതി റിപ്പോര്‍ട്ട് ആവശ്യപ്പെട്ടതിനെ തുര്‍ന്നാണ് മലപ്പുറം എസ്.പി പിതാവില്‍ നിന്നും മൊഴി രേഖപ്പെടുത്തിയത്. അതേസമയം മലപ്പുറം ജില്ലാ കലക്ടര്‍ കെ.ഗോപാലകൃഷ്ണനും ഇന്നലെ കുഞ്ഞുങ്ങളുടെ പിതാവിനെ ഫോണില്‍ ബന്ധപ്പെട്ടു വിവരങ്ങള്‍ ആരാഞ്ഞിരുന്നു. ആരോഗ്യ വകുപ്പ് അധികൃതരുടെ വിശദീകരണം മാത്രം കേട്ട് തീരുമാനം എടുക്കാനാകില്ലെന്നും കുടുംബാംഗങ്ങളില്‍ നിന്നും വിവരങ്ങള്‍ ശേഖരിക്കുമെന്നും ജില്ലാ കലക്ടറുടെ ഓഫിസ് അറിയിച്ചു. അടുത്ത ദിവസം തന്നെ പിതാവില്‍ നിന്ന് കൂടുതല്‍ വിശദീകരണം ആവശ്യപ്പെടും. ഭാര്യയുടെ ചികിത്സയുമായി ബന്ധപ്പെട്ട് ഷെരീഫ് കോഴിക്കോട് മെഡിക്കല്‍ കോളജ് ആശുപത്രിയില്‍ ആയതിനാല്‍ നേരിട്ട് ഹാജരാകുന്നതിന് പകരം എഴുതി തയാറാക്കിയ വിശദീകരണമാകും ജില്ലാ കലക്ടര്‍ക്കു കൈമാറുക.