തിരുവനന്തപുരം: സംസ്ഥാന പൊലിസ് മേധാവി ലോക്‌നാഥ് ബെഹ്‌റയുടെയും എസ്.പി ദേബേഷ് ബെഹ്‌റയുടെയും വിദേശ യാത്ര കേന്ദ്ര തെരഞ്ഞെടുപ്പ് കമ്മിഷന്‍ തടഞ്ഞു.
ഇന്നലെ ദുബൈയിലേക്ക് പോകുന്നതിന് ഇരുവര്‍ക്കും സംസ്ഥാന സര്‍ക്കാര്‍ അനുമതി നല്‍കിയിരുന്നു. എന്നാല്‍ തെരഞ്ഞെടുപ്പ് പെരുമാറ്റച്ചട്ടം നിലവിലുള്ളതിനാല്‍ അനുമതി തല്‍ക്കാലം നല്‍കേണ്ടെന്ന് കമ്മിഷന്‍ തീരുമാനിക്കുകയായിരുന്നു. ദുബൈയിലെ ഓട്ടോമാറ്റിക് പൊലിസ് സ്റ്റേഷന്റെ പ്രവര്‍ത്തനം പഠിക്കുന്നതിന് മൂന്നു ദിവസത്തെ യാത്രയ്ക്കാണ് ഡി.ജി.പി മുഖ്യ തെരഞ്ഞെടുപ്പ് ഓഫിസറുടെ അനുമതി തേടിയത്.
സംസ്ഥാന സര്‍ക്കാരിന്റെ അനുമതി ചൂണ്ടിക്കാട്ടി സംസ്ഥാന തെരഞ്ഞെടുപ്പ് ഓഫിസര്‍ കേന്ദ്ര തെരഞ്ഞെടുപ്പ് കമ്മിഷന്റെ അനുമതി തേടുകയായിരുന്നു. എന്നാല്‍ ഇന്ന് കണ്ണൂര്‍, കാസര്‍കോട് ഉള്‍പ്പെടെയുള്ള മണ്ഡലങ്ങളില്‍ റീപോളിങ് നടക്കാനിരിക്കുന്ന സാഹചര്യത്തിലും കൗണ്ടിങ്ങിനുള്ള സുരക്ഷ ഉറപ്പാക്കുന്നതിനും യാത്ര ഒഴിവാക്കാന്‍ കമ്മിഷന്‍ ബെഹ്‌റമാരോട് നിര്‍ദേശിക്കുകയായിരുന്നു.