ല@ണ്ടന്‍: വനിതകളുടെ ചാംപ്യന്‍സ് ലീഗ് ഫൈനലില്‍ ബാഴ്‌സലോണയുടെ വനിതാ ടീമിനും നാല് ഗോളിന്റെ തോല്‍വി. പുരുഷന്‍മാരുടെ ചാംപ്യന്‍സ് ലീഗ് സെമിയില്‍ ലിവര്‍പൂളിനോട് നാല് ഗോളിന്റെ തോല്‍വിയേറ്റുവാങ്ങിയതിന്റെ ക്ഷീണം മാറും മുന്‍പായിരുന്നു വനിതാ ടീമിനും തോല്‍വി പിണഞ്ഞത്.
ഫ്രഞ്ച് ക്ലബായ ലിയോണാണ് 4-1 എന്ന സ്‌കോറിന് ബാഴ്‌സലോണയെ തകര്‍ത്ത് വനിതാ ചാംപ്യന്‍സ് ലീഗില്‍ കിരീടം ചൂടിയത്.
തുടര്‍ച്ചയായ നാലാം തവണയാണ് ലിയോണിന്റെ ചാംപ്യന്‍സ് ലീഗ് കിരീടനേട്ടം. സൂപ്പര്‍താരം അദ ഹെകര്‍ബര്‍ഗിന്റെ ഹാട്രികിന്റെ ബലത്തിലായിരുന്നു ലിയോണിന്റെ ജയം. മത്സരത്തിലുടനീളം മികച്ച പ്രകടനം പുറത്തെടുത്ത ലിയോണ്‍ ബാഴ്‌സലോണക്ക് മേല്‍ വ്യക്തമായ ആധിപത്യം സ്വന്തമാക്കി.
ആറാം മിനുട്ടില്‍ ക്യാപ്റ്റന്‍ ഡെന്‍സിഫര്‍ ലിയോണിനായി ലീഡ് നല്‍കി. ഇതിന് പിന്നാലെ 14, 19, 30 മിനുട്ടുകളില്‍ അദ ഹാട്രിക്കും സ്വന്തമാക്കി. ആദ്യ പകുതിയില്‍ തന്നെയായിരുന്നു ലിയോണിന്റെ നാലു ഗോളുകളും പിറന്നത്. അസിസാറ്റ് ഒഷോല 89-ാം മിനുട്ടില്‍ ബാഴ്‌സലോണയ്ക്കായി ആശ്വാസഗോള്‍ നേടി.