മാനന്തവാടി: എന്റെ മാലിന്യം എന്റെ ഉത്തരവാദിത്വം എന്ന സന്ദേശമുയര്‍ത്തി വിദ്യാര്‍ഥികള്‍ക്കായി സംഘടിപ്പിക്കുന്ന സമ്മര്‍ ക്യാംപിന് തുടക്കമായി.
ശുചിത്വമിഷന്റെ ഭാഗമായി കുട്ടികളില്‍ മാലിന്യം നിര്‍മാര്‍ജനത്തിന്റെ സന്ദേശം വളര്‍ത്തിയെടുക്കുക എന്ന ലക്ഷ്യത്തോടെയാണ് നഗരസഭയുടെയും പഞ്ചായത്തുകളുടെയും നേതൃത്വത്തില്‍ സര്‍ക്കാരിന്റെ നിര്‍ദേശാനുസരണം കുട്ടികളോടൊത്ത് വൃത്തിയുള്ള ലോകമൊരുക്കാം എന്ന സന്ദേശം ഉയര്‍ത്തി ചക്ക മാങ്ങ തേങ്ങ ക്യാംപുകള്‍ സംഘടിപ്പിക്കുന്നത്. മാനന്തവാടി നഗരസഭയുടെ നേതൃത്വത്തില്‍ ടൗണ്‍ഹാളില്‍ നടന്ന ക്യാംപ് നഗരസഭ ചെയര്‍മാന്‍ വി.ആര്‍ പ്രവിജ് ഉദ്ഘാനം ചെയ്തു.
മൂന്ന് ദിവസം നീണ്ടുനില്‍ക്കുന്ന ക്യാംപില്‍ 75ഓളം കുട്ടികളാണ് പങ്കെടുക്കുന്നത്. ചടങ്ങില്‍ നഗരസഭ കൗണ്‍സിലര്‍മാരായ ലില്ലി കുര്യന്‍, ജേക്കബ് സെബാസ്റ്റ്യന്‍, ഹുസൈന്‍ കുഴിനിലം, അരുണ്‍കുമാര്‍, വി.യു ജോയി സംസാരിച്ചു. വി.ജി ഗിരിജ, പി.സി ജോണ്‍, ബാലകൃഷ്ണന്‍ മാസ്റ്റര്‍ വിവിധ വിഷയങ്ങളില്‍ ക്ലാസെടുത്തു.