കല്‍പ്പറ്റ: ജില്ലയില്‍ സംഘടനാവിരുദ്ധ പ്രവര്‍ത്തനങ്ങള്‍ നടത്തിയതിനെതുടര്‍ന്ന് കെ.പി.സി.സി നിര്‍ദേശപ്രകാരം പുറത്താക്കിയ കോണ്‍ഗ്രസ് പ്രവര്‍ത്തകരെ തിരിച്ചെടുക്കാന്‍ തീരുമാനം.
കോണ്‍ഗ്രസിലെ മുതിര്‍ന്ന നേതാവായിരുന്ന പി.വി ജോണിന്റെ ആത്മഹത്യ വിവാദവുമായും, മുന്‍ മന്ത്രി പി.കെ ജയലക്ഷ്മിക്കെതിരേയുള്ള വിവാദങ്ങളുമായും ബന്ധപ്പെട്ട് പുറത്താക്കിയ പ്രവര്‍ത്തകരെയാണ് തിരിച്ചെടുക്കുന്നത്. മാനന്തവാടി ഗ്രാമപഞ്ചായത്ത് മുന്‍ പ്രസിഡന്റും ഡി.സി.സി ജനറല്‍ സെക്രട്ടറിയും മഹിളാ കോണ്‍ഗ്രസ് നേതാവുമായിരുന്ന സില്‍വി തോമസ്, മുന്‍ മന്ത്രി പി.കെ ജയലക്ഷ്മിയുടെ അഡീഷണല്‍ പ്രൈവറ്റ് സെക്രട്ടറിയും ഡി.സി.സി ജനറല്‍ സെക്രട്ടറിയുമായിരുന്ന അഡ്വ. ശ്രീകാന്ത് പട്ടയന്‍, കോണ്‍ഗ്രസ്, യൂത്ത് കോണ്‍ഗ്രസ് നേതാക്കളായ എം.എം നിഷാന്ത്, സി.എച്ച് സുഹൈര്‍, എറമ്പയില്‍ മുസ്തഫ, ഇ.സി രൂപേഷ്, സാബു മണിത്തൊട്ടി, ജി.എസ്.ടി.യു മുന്‍ ജില്ലാ പ്രസിഡന്റും ഡി.സി.സി അംഗവുമായിരുന്ന പി.കെ രാജന്‍, മുന്‍ ബ്ലോക്ക് സെക്രട്ടറി അഡ്വ. ജോസ് കുമ്പയ്ക്കല്‍, മണ്ഡലം സെക്രട്ടറി ആയിരുന്ന ലേഖ രാജീവന്‍ തുടങ്ങിയ മാനന്തവാടിയിലെ പ്രമുഖ കോണ്‍ഗ്രസ് പ്രവര്‍ത്തകരെല്ലാം ഇനി പാര്‍ട്ടിയിലേക്ക് തിരികെ വരും.
എന്നാല്‍ പി.വി ജോണ്‍ ആത്മഹത്യ വിവാദത്തിലെ മുഖ്യ ആരോപണവിധേയനായ വി.കെ ജോസിനെ തിരിച്ചെടുക്കുന്ന കാര്യത്തില്‍ തീരുമാനമായിട്ടില്ല.
ഇതോടെ തെരഞ്ഞെടുപ്പ് സമയത്ത് ഏറെ സജീവമാവുകയും എം.എല്‍.എ ഒ.ആര്‍ കേളുവിന്റെ വിജയത്തില്‍ നിര്‍ണായക പങ്ക് വഹിക്കുകയും ചെയ്ത സേവ് കോണ്‍ഗ്രസ് ഇല്ലാതാവും.