കണ്ണൂരിന്റെ ചുവന്നമണ്ണ് ചുവപ്പിന് മാത്രമുള്ളതല്ലെന്ന് ഒരിക്കല്‍കൂടി തെളിയിച്ചിരിക്കുന്നു. പതിറ്റാണ്ടുകള്‍ക്കു ശേഷം എല്‍.ഡി.എഫ് അധികാരം പിടിച്ചടക്കിയ കണ്ണൂര്‍ മണ്ഡലത്തിന്റെ അമരക്കാരനാകാന്‍ തനിക്കുമാത്രമേ കഴിയുള്ളൂവെന്ന് ഒരിക്കല്‍കൂടി തെളിയിച്ചിരിക്കുകയാണ് യു.ഡി.എഫ് സ്ഥാനാര്‍ഥി കെ.സുധാകരന്‍.

2009 ആവര്‍ത്തിച്ചു അത് ഇരട്ടിമധുരത്തോടെ. അന്നു ലഭിച്ചത് 43191 വോട്ടിന്റെ ഭൂരിപക്ഷമാണെങ്കില്‍ ഇത്തവണ അത് ഒരു ലക്ഷത്തിലെത്തി. എക്‌സിററ് പോള്‍ ഫലങ്ങളിലെല്ലാം ഇഞ്ചോടിഞ്ച് പോരാട്ടം പ്രവചിച്ച കണ്ണൂരില്‍ എല്‍.ഡി.എഫ് സ്ഥാനാര്‍ഥി പി.കെ ശ്രീമതിക്ക് വോട്ടെണ്ണലിന്റെ ഒരു തലത്തിലും മുന്‍തൂക്കം ലഭിച്ചിരുന്നില്ല.

എല്‍.ഡി.എഫിന്റെ കുത്തക മണ്ഡലങ്ങളില്‍ പോലും സി.പി.എമ്മിന് അടിപതറിയ കാഴ്ചയാണ് കണ്ടത്. തളിപ്പറമ്പ്, ഇരിക്കൂര്‍, അഴീക്കോട്, കണ്ണൂര്‍, ധര്‍മടം, മട്ടന്നൂര്‍, പേരാവൂര്‍ നിയമസഭാ മണ്ഡലങ്ങളുള്‍പ്പെടുന്ന കണ്ണൂര്‍ മണ്ഡലത്തിലെ ഭൂരിഭാഗവും യു.ഡി.എഫിനൊപ്പമാണ് നിന്നത്.
ബി.ജെ.പിക്ക് ശക്തിയുള്ള കണ്ണൂരില്‍ സ്ഥാനാര്‍ഥി സി.കെ പത്മനാഭന് ഏഴു ശതമാനം വോട്ട് മാത്രമാണ് നേടാനായത്.

എല്‍.ഡി.എഫിന്റെ സ്ഥാനാര്‍ഥി നിര്‍ണയത്തില്‍ ആദ്യം പി.കെ ശ്രീമതിക്കു പകരം ജയരാജന്റെ പേരുകള്‍ വന്നെങ്കിലും വീണ്ടും ശ്രീമതിക്ക് നറുക്ക് വീഴുകയായിരുന്നു. യു.ഡി.എഫ് സ്ഥാനാര്‍ഥി നിര്‍ണയത്തില്‍ ആദ്യം ആശയക്കുഴപ്പങ്ങള്‍ നിലനിന്നിരുന്നെങ്കിലും സുധാകരന്‍ തന്നെ പോരാടാനിറങ്ങുകയയായിരുന്നു.

2016 നിയമസഭയിലും 2014 ലോക്‌സഭയിലും തോറ്റതിനു ശേഷവും കണ്ണൂരിന്റെ യു.ഡി.എഫ് സ്ഥാനാര്‍ഥിയാകാന്‍ മുന്നണി വേറെ ആളെ തിരയേണ്ടിവന്നില്ല. കാരണം പി.കെ ശ്രീമതിയെ തോല്‍പിക്കാന്‍ സാക്ഷാല്‍ സുധാകരന്‍ തന്നെ വേണമെന്ന് യു.ഡി.എഫിനറിയാമായിരുന്നു.
പ്രധാനമായും വികസന വിഷയം മാത്രമാണ് കണ്ണൂരില്‍ പ്രചാരണവേളകളിലുടനീളം യു.ഡി.എഫ് ഉന്നയിച്ചത്. എന്നാല്‍ അതു ചെറുക്കാന്‍ എല്‍.ഡി.എഫിനായില്ല എന്നുവേണം മനസ്സിലാക്കാന്‍. പിണറായി വിജയന്‍, ഇ.പി ജയരാജന്‍, രാമചന്ദ്രന്‍ കടന്നപ്പള്ളി തുടങ്ങിയ എല്‍.ഡി.എഫ് മുന്നണിയിലെ മന്ത്രിമാരുടെ മണ്ഡലമായ കണ്ണൂരില്‍ സുധാകരന്‍ വെന്നിക്കൊടി പാറിക്കുമ്പോള്‍ അത് സര്‍ക്കാരിനും തിരിച്ചടിയാകും.
കള്ളവോട്ട് നടന്ന് കോരളത്തില്‍ റീ പോളിങ് നടന്നതില്‍ മൂന്നു ബൂത്തുകള്‍ കണ്ണൂരില്‍നിന്നുള്ളതാണ്. അതും ജനാധിപത്യ വിജയമായി കണ്ട് കോണ്‍ഗ്രസിന് മുന്നേറാന്‍ കഴിഞ്ഞു എന്നതാണ് വാസ്ഥവം.