ശ്രീനഗര്‍: അല്‍ഖ്വയിദയുമായി ബന്ധപ്പെട്ട അന്‍സാര്‍ ഗസ്‌വത്തുല്‍ ഹിന്ദ് എന്ന ഭീകര സംഘടനാ പ്രവര്‍ത്തകന്‍ സാകിര്‍ മൂസയെ വധിച്ചതിനു പിന്നാലെ അക്രമം ഉണ്ടായേക്കുമെന്ന സംശയത്തെ തുടര്‍ന്ന് കശ്മിരില്‍ പ്രഖ്യാപിച്ച കര്‍ഫ്യൂ ശക്തമാക്കി. പുല്‍വാമ ജില്ലയില്‍ സുരക്ഷാ സേനയുമായുണ്ടായ ഏറ്റുമുട്ടലിലാണ് സാകിര്‍ മൂസ കൊല്ലപ്പെട്ടത്. സാകിര്‍ മൂസയുടെ വധത്തില്‍ പ്രതിഷേധിച്ച് ശ്രീനഗര്‍, കുല്‍ഗാം, പുല്‍വാമ തുടങ്ങിയ മേഖലകളില്‍ അക്രമം വ്യാപിച്ചതിനെ തുടര്‍ന്നാണ് സുരക്ഷാ സൈന്യം കര്‍ഫ്യൂ പ്രഖ്യാപിച്ചത്.
സ്‌കൂളുകളും കോളജുകളും അടക്കുകയും മൊബൈല്‍ ഇന്റര്‍നെറ്റ് സംവിധാനം സസ്‌പെന്‍ഡ് ചെയ്യുകയും ചെയ്തിട്ടുണ്ട്. ബാരാമുള്ള-ബാനിഹാള്‍ റൂട്ടില്‍ ട്രെയിന്‍ ഗതാഗതവും താല്‍ക്കാലികമായി റദ്ദാക്കിയിട്ടുണ്ട്. മുന്‍കരുതല്‍ നടപടിയെന്ന നിലയിലാണ് കര്‍ഫ്യൂവില്‍ ഇളവ് വരുത്താത്തതെന്ന് പൊലിസ് അറിയിച്ചു.