തളിപ്പറമ്പ്: പരിയാരത്ത് ആളൊഴിഞ്ഞ കടയുടെ തൂണില്‍ മധ്യവയസ്‌കനെ ചങ്ങലയില്‍ ബന്ധിച്ച നിലയില്‍ കണ്ടെത്തി. നാദാപുരം സ്വദേശി ചെറിയകോയ(45)യെയാണ് തിങ്കളാഴ്ച്ച രാത്രി മെഡിക്കല്‍ കോളജിന് സമീപത്തെ കടവരാന്തയില്‍ കാലില്‍ ഇരുമ്പ് ചങ്ങല കൊണ്ട് ബന്ധിച്ച് തൂണില്‍ കെട്ടിയ നിലയില്‍ കണ്ടത്. ഇയാള്‍ കരയുന്നത് കേട്ട് എത്തിയ നാട്ടുകാര്‍ പരിയാരം പൊലിസില്‍ വിവരമറിയിക്കുകയായിരുന്നു. പരിയാരം എസ്.ഐ വി.ആര്‍ വിനീഷും സംഘവും കടയുടെ തൂണ് പൊളിച്ച് ഇയാളെ സ്റ്റേഷനില്‍ എത്തിക്കുകയായിരുന്നു. തളിപ്പറമ്പില്‍ നിന്നു അഗ്‌നിശമനസേന എത്തിയാണ് കാലിലെ ചങ്ങല അഴിച്ചത്. നാദാപുരം സ്വദേശി ചെറിയകോയ എന്നാണ് പേരെന്നും ബന്ധുക്കള്‍ ഏര്‍പ്പെടുത്തിയവരാണ് തന്നെ തൂണില്‍ ബന്ധിച്ചതെന്നുമാണ് ഇയാള്‍ പറഞ്ഞത്. ചെറിയ രീതിയില്‍ മാനസിക അസ്വാസ്ഥ്യം പ്രകടിപ്പിക്കുന്ന ഇയാളെ ബന്ധുക്കള്‍ ഇവിടെ കൊണ്ടുവന്ന് ഉപേക്ഷിച്ചതായിരിക്കാമെന്ന സംശയത്തില്‍ നാദാപുരം പൊലിസുമായി ബന്ധപ്പെട്ട് ബന്ധുക്കളെ കണ്ടെത്താന്‍ അന്വേഷണം നടത്തിയെങ്കിലും വിവരവും ലഭിച്ചില്ല. ഇന്നലെ വൈകുന്നേരത്തോടെ സ്റ്റേഷനില്‍ നിന്ന് പിരിവെടുത്ത് 150 രൂപ നല്‍കി ഇയാളെ പറഞ്ഞയച്ചതായി പൊലിസ് പറഞ്ഞു.