ലക്‌നൗ: ഉത്തര്‍പ്രദേശിലെ മഥുരയില്‍ ആനപ്പുറത്തുകയറി യോഗ ചെയ്ത ബാബാ രാംദേവിനെ ആന കുടഞ്ഞ് താഴെയിട്ടു. മഥുരയിലെ ഒരു ആശ്രമത്തില്‍ ചിലര്‍ക്കു യോഗ പരിശീലിപ്പിക്കാനെത്തിയതായിരുന്നു രാംദേവ്. ഇദ്ദേഹം ആനപ്പുറത്തുനിന്ന് താഴെവീഴുന്നതിന്റെയും എണീറ്റുപോകുന്നതിന്റെയും ദൃശ്യങ്ങള്‍ പ്രചരിക്കുന്നുണ്ട്.

ആനപ്പുറത്ത് കയറിയിരുന്ന് യോഗ അഭ്യസിക്കുന്ന രാംദേവിനെയാണ് വിഡിയോയില്‍ ആദ്യം കാണിക്കുന്നത്. ഇതിനിടെ ആന അസ്വസ്ഥത പ്രകടിപ്പിക്കുന്നതും രാംദേവ് ബാലന്‍സ് ചെയ്ത് ഇരിക്കുന്നതും കാണാം. എന്നാല്‍, അധികം വൈകാതെ ആന രാംദേവിനെ കുടഞ്ഞ് താഴെയിട്ടു. നിലത്തുവീണ രാംദേവ് ചെറുചിരിയോടെ ശരീരത്തിലെ പൊടിതട്ടി എണീറ്റുപോകുന്നതും വിഡിയോയിലുണ്ട്. വിഡിയോ വൈറലായതോടെ സോഷ്യല്‍മീഡിയയില്‍ വന്‍ പരിഹാസമാണുയരുന്നത്.