മലപ്പുറം: കെ.എം ഷാജി എം.എല്‍.എക്കെതിരായ വധഭീഷണി അതീവ ഗൗരവമുള്ളതാണെന്ന് പി.കെ കുഞ്ഞാലിക്കുട്ടി എം.പി. രണ്ടു സംസ്ഥാനങ്ങളിലായി ഗൂഢാലോചന നടന്നത് വ്യക്തമായ സാഹചര്യത്തില്‍ കേന്ദ്ര ഏജന്‍സികള്‍ അന്വേഷണം നടത്തണമെന്നും കുഞ്ഞാലിക്കുട്ടി ആവശ്യപ്പെട്ടു.

രാഷ്ട്രീയമായി എതിര്‍ചേരിയിലുള്ളവരെ ഉന്മൂലനം ചെയ്യുന്നതിനുള്ള ശ്രമങ്ങള്‍ ജനാധിപത്യത്തിന് തന്നെ ഭീഷണിയാണ്. ഇത്തരം വിഷയത്തില്‍ കേന്ദ്ര അന്വേഷണ ഏജന്‍സികള്‍ക്ക് മാത്രമേ ഗൂഢാലോചന പുറത്തുകൊണ്ടുവരാന്‍ സാധിക്കുകയുള്ളൂ. എങ്കില്‍ മാത്രമേ നിക്ഷ്പക്ഷവും നീതിപൂര്‍ണ്ണവുമായ അന്വേഷണം സാധ്യമാവുകയുള്ളൂവെന്നും കുഞ്ഞാലിക്കുട്ടി പറഞ്ഞു.

തന്നെ വധിക്കാന്‍ ഗൂഢാലോചന നടക്കുന്നുവെന്ന് കെ.എം ഷാജി എം.എല്‍.എയുടെ പരാതിപ്പെട്ടിരുന്നു. മുംബൈ ഗുണ്ടാ സംഘങ്ങളുമായി സംസാരിക്കുന്നുവെന്ന് സംശയിക്കുന്ന ശബ്ദരേഖയും എം.എല്‍.എ പുറത്തുവിട്ടു. മൂന്നു ദിവസമായി നിരവധി ഭീഷണി ഫോണ്‍ വിളികള്‍ ലഭിച്ചുവെന്നും എം.എല്‍.എ മുഖ്യമന്ത്രിക്കും സംസ്ഥാന പൊലിസ് മേധാവിക്കും നിയമസഭാ സ്പീക്കര്‍ക്കും നല്‍കിയ പരാതിയില്‍ ചൂണ്ടിക്കാട്ടി.

എം.എല്‍.എയുടെ പരാതിയില്‍ കേസെടുത്തതായി കണ്ണൂര്‍ ഡിവൈ.എസ്.പി പി.പി സദാനന്ദന്‍ അറിയിച്ചു. ശബ്ദരേഖയുടെ ഉറവിടത്തെക്കുറിച്ച് അന്വേഷിക്കുമെന്നും പൊലിസ് വ്യക്തമാക്കി.

മുംബൈ ഗുണ്ടാ സംഘവുമായി ബന്ധമുണ്ടെന്ന് സംശയിക്കുന്ന പാപ്പിനിശ്ശേരി സ്വദേശി തേജസ്, യൂനുസ് എന്നയാളുമായി ഹിന്ദിയില്‍ സംസാരിക്കുന്ന ശബ്ദരേഖയാണ് പുറത്തുവന്നത്. കണ്ണൂരിലെ ചില ഗുണ്ടാ സംഘങ്ങളുടെ തര്‍ക്കത്തിന്റെ ഫലമായാണ് ശബ്ദരേഖ ശനിയാഴ്ച തനിക്കു ലഭിച്ചതെന്ന് കെ.എം ഷാജി സുപ്രഭാതത്തോടു പറഞ്ഞു.