ചെന്നൈ: രാഹുല്‍ ഗാന്ധിക്കും കോണ്‍ഗ്രസിനും പൂര്‍ണ പിന്തുണ നല്‍കി വീണ്ടും ഡി.എം.കെ.
കോണ്‍ഗ്രസ് അധ്യക്ഷ പദവിയില്‍ നിന്ന് മാറിനില്‍ക്കാന്‍ സന്നദ്ധത പ്രകടിപ്പിച്ച രാഹുല്‍ ഗാന്ധി, സ്ഥാനത്യാഗം ചെയ്യരുതെന്ന് ആവര്‍ത്തിച്ച് ആവശ്യപ്പെട്ട എം.കെ സ്റ്റാലിന്‍ ഇന്നലെ വീണ്ടും രാഹുലിനെ പുകഴ്ത്തി രംഗത്തെത്തി. ജവഹര്‍ലാല്‍ നെഹ്‌റു കഴിഞ്ഞാല്‍ സ്വതന്ത്ര ആശയങ്ങളുമായി പ്രവര്‍ത്തിക്കുന്ന നേതാവാണ് രാഹുല്‍ ഗാന്ധിയെന്നാണ് അദ്ദേഹം ഇന്നലെ വിശേഷിപ്പിച്ചത്.
കോണ്‍ഗ്രസില്‍ വിശാല മനസ്‌കനായ ഒരു നേതാവായിരുന്നു നെഹ്‌റു. അതേരീതിയില്‍ തന്നെയാണ് രാഹുല്‍ ഗാന്ധിയെന്നും അദ്ദേഹം കൂട്ടിച്ചേര്‍ത്തു.
കോണ്‍ഗ്രസ് അധ്യക്ഷ പദവിയില്‍ നിന്ന് രാഹുല്‍ രാജിവയ്ക്കുകയല്ലവേണ്ടത്. മറിച്ച് പാര്‍ട്ടിയുടെ അടിത്തറ വിപുലമാക്കാനാണ് ശ്രമിക്കേണ്ടത്. അത്തരത്തിലുണ്ടായാല്‍ അടുത്ത തെരഞ്ഞെടുപ്പില്‍ വിജയം സുനിശ്ചിതമാണെന്നും സ്റ്റാലിന്‍ വ്യക്തമാക്കി.