ചെറുപുഴ: ചെറുപുഴ അരിയിരുത്തിയില്‍ വീട്ടിനുള്ളില്‍ രാജവെമ്പാലയെ കണ്ടെത്തി. അരിയിരുത്തിയിലെ പരേതനായ തെന്നടിയില്‍ ബെന്നിയുടെ വീടിന്റെ സിറ്റൗട്ടില്‍ ആണ് രാജവെമ്പാലയെ കണ്ടെത്തിയത്. വീട്ടുകാരുടെ നിലവിളികേട്ട് നാട്ടുകാര്‍ ഓടിക്കൂടുകയായിരുന്നു. രാജവെമ്പാലയെ കണ്ടെത്തിയത് എന്നറിഞ്ഞ് നാടിന്റെ വിവിധ ഭാഗത്തു നിന്നുമായി നൂറുകണക്കിന് ആളുകളാണ് സ്ഥലത്തെത്തി. ആളുകളെ നിയന്ത്രിക്കാന്‍ ചിറ്റാരിക്കാല്‍ പൊലിസും സ്ഥലത്തെത്തിയിരുന്നു. പിന്നീട് ഫോറസ്റ്റ് ബീറ്റ് ഓഫിസര്‍ ഡി. ജോയിയുടെ നേതൃത്വത്തില്‍ ഉള്ള സംഘം സ്ഥലത്തെത്തി. മലോം സ്വദേശി സിബി, ജോബിന്‍ എന്നിവരാണ് രാജവെമ്പാലയെ പിടികൂടിയത്.