കോഴിക്കോട്: പൊലിസ് കോണ്‍സ്റ്റബിള്‍ റാങ്ക്‌ലിസ്റ്റില്‍ നിന്നുള്ള നിയമനത്തില്‍ വന്‍കുറവ്. ലിസ്റ്റിന്റെ കാലാവധി ജൂണ്‍ 20ന് അവസാനിക്കുമ്പോള്‍ 2,576 പേര്‍ക്ക് മാത്രമാണ് നിയമന ശുപാര്‍ശ ലഭിച്ചിരിക്കുന്നത്. ഏഴു ബറ്റാലിയനുകളിലായി 9,041 പേരെയാണ് പി.എസ്.സി റാങ്ക് ലിസ്റ്റുകളില്‍ ഉള്‍പ്പെടുത്തിയിരിക്കുന്നത്. ലിസ്റ്റിന്റെ കാലാവധിക്ക് മുന്‍പ് ഇതില്‍ പകുതിപ്പേര്‍ക്കു പോലും നിയമനം ലഭിക്കാന്‍ സാധ്യതയില്ല.
ഏഴു ബറ്റാലിയനുകളിലായി 2016 ജൂണ്‍ 21 ന് നിലവില്‍ വന്ന പൊലിസ് കോണ്‍സ്റ്റബിള്‍ റാങ്ക് ലിസ്റ്റുകളില്‍നിന്ന് ഇതുവരെ നടന്നത് 2,576 നിയമന ശുപാര്‍ശ മാത്രം. ഏറ്റവും കുടുതല്‍ പേര്‍ക്ക് നിയമന ശുപാര്‍ശ നല്‍കിയിരിക്കുന്നത് തൃശുര്‍ (കെ.എ.പി-2) ജില്ലയിലാണ് 595. ഏറ്റവും കുറവ് നിയമനങ്ങള്‍ എറണാകുളം (കെ.എ.പി - 1)ജില്ലയില്‍ 217. തൃശുര്‍ ഒഴികെ മറ്റൊരു ജില്ലയിലും 500ല്‍ അധികം നിയമനങ്ങള്‍ നടന്നിട്ടില്ല. പത്തനംതിട്ട, ഇടുക്കി ജില്ലകളില്‍ ഒരു തവണ മാത്രമാണ് നിയമന ശുപാര്‍ശ നടന്നത്.
നിലവിലുള്ള ഒഴിവുകളും മുന്‍ നിയമന ശുപാര്‍ശയെ തുടര്‍ന്നുള്ള എന്‍.ജെ.ഡി ഒഴിവുകളും റിപ്പോര്‍ട്ട് ചെയ്യുന്നതില്‍ പൊലിസ് വകുപ്പിന്റെ ഭാഗത്തുനിന്നുമുണ്ടാകുന്ന കടുത്ത അലംഭാവമാണ് നിയമനം തടസപ്പെടാന്‍ കാരണമെന്ന് ഉദ്യോഗാര്‍ഥികള്‍ ആരോപിക്കുന്നു.
സാധാരണ പൊലിസ് കോണ്‍സ്റ്റബിള്‍ തസ്തികയുടെ മുന്‍ റാങ്ക് ലിസ്റ്റുകള്‍ മെയിന്‍ ലിസ്റ്റില്‍നിന്നു എല്ലാവര്‍ക്കും നിയമന ശുപാര്‍ശ ലഭിക്കുക വഴി അവസാനിക്കുകയാണ് പതിവ്. എന്നാല്‍ ഇത്തവണ ലിസ്റ്റുകളില്‍നിന്ന് പകുതി പേര്‍ക്ക് പോലും നിയമന ശുപാര്‍ശ നടക്കാനുള്ള യാതൊരു സാധ്യതയും കാണുന്നില്ല. യോഗ്യതാ ഭേദഗതിക്കനുസരിച്ച് സ്‌പെഷല്‍ റൂളില്‍ മാറ്റംവരുത്താത്ത സാഹചര്യത്തില്‍ ഈ തസ്തികയുടെ പുതിയ വിജ്ഞാപനം പ്രസിദ്ധീകരിക്കുന്നത് പി.എസ്.സി തല്‍ക്കാലം മാറ്റിവച്ചിരിക്കുകയാണ്.
നിലവിലുള്ള റാങ്ക് ലിസ്റ്റിന്റെ കാലാവധി ദീര്‍ഘിപ്പിക്കാനും സാധ്യതയില്ല. അതിനാല്‍ ജൂണ്‍ 20ന് ശേഷംവരുന്ന പൊലിസ് കോണ്‍സ്റ്റബിള്‍ ഒഴിവുകള്‍ നികത്തുവാന്‍ റാങ്ക് ലിസ്റ്റില്ലാത്ത സാഹചര്യമാണുണ്ടാവുക.