ന്യൂഡൽഹി: ഇലോൺ മസ്കിന്റെ സ്റ്റാർലിങ്കിന് ഇന്ത്യയിൽ ഉപഗ്രഹ ഇന്റർനെറ്റ് സേവനങ്ങൾ ആരംഭിക്കാൻ ഇന്ത്യൻ നാഷണൽ സ്പേസ് പ്രമോഷൻ ആൻഡ് ഓതറൈസേഷൻ സെന്റർ (ഇൻസ്പേസ്) അനുമതി നൽകി. സ്റ്റാർലിങ്കിന്റെ ഇന്ത്യൻ ഉപകമ്പനിയായ സ്റ്റാർലിങ്ക് സാറ്റലൈറ്റ് കമ്യൂണിക്കേഷൻസ് പ്രൈവറ്റ് ലിമിറ്റഡിനാണ് ഈ അനുമതി ലഭിച്ചത്.

നേരത്തെ, ടെലികോം മന്ത്രാലയവും സ്റ്റാർലിങ്കിന് പ്രവർത്തന അനുമതി നൽകിയിരുന്നു. ഇൻസ്പേസിന്റെ അനുമതിയോടെ, ഇന്ത്യയിൽ സേവനം ആരംഭിക്കാനുള്ള പ്രധാന തടസ്സം മറികടന്നു. അഞ്ച് വർഷത്തേക്കാണ് സ്റ്റാർലിങ്കിന് അനുമതി ലഭിച്ചിരിക്കുന്നത്. സ്പെക്ട്രം അനുവദനം കൂടി ലഭിച്ചാൽ, സ്റ്റാർലിങ്കിന് ഇന്ത്യയിൽ ഇന്റർനെറ്റ് സേവനങ്ങൾ നൽകാൻ കഴിയും. സ്റ്റാർലിങ്കിനൊപ്പം, എസ്ഇഎസിനും ഇൻസ്പേസ് അനുമതി നൽകിയിട്ടുണ്ട്. എസ്ഇഎസുമായി ചേർന്ന് ജിയോയും ഉപഗ്രഹ ഇന്റർനെറ്റ് സേവനങ്ങൾ ആരംഭിക്കുന്നുണ്ട്.

ഡൽഹി ആസ്ഥാനമായ സ്റ്റാർലിങ്ക് സാറ്റലൈറ്റ് കമ്യൂണിക്കേഷൻസ് പ്രൈവറ്റ് ലിമിറ്റഡിന്, ഭൂമിയിൽനിന്ന് 540-570 കിലോമീറ്റർ ഉയരത്തിൽ ഭ്രമണം ചെയ്യുന്ന 4,408 ഉപഗ്രഹങ്ങൾ ഉൾപ്പെടുന്ന സ്റ്റാർലിങ്ക് ജനറേഷൻ-1 LEO (ലോ എർത്ത് ഓർബിറ്റ്) വഴി ഇന്റർനെറ്റ് സേവനങ്ങൾ നൽകാനാണ് അനുമതി.

ഈ തീരുമാനം ഇന്ത്യയുടെ ഉൾപ്രദേശങ്ങൾ ഉൾപ്പെടെ അതിവേഗ ഇന്റർനെറ്റ് സേവനങ്ങൾ ലഭ്യമാക്കുന്നതിന് സഹായകമാകും. സർക്കാർ വകുപ്പുകളിൽനിന്നുള്ള അന്തിമ അനുമതി ലഭിച്ച ശേഷമേ പ്രവർത്തനം ആരംഭിക്കാനാകൂ. ബഹിരാകാശ മേഖലയിൽ സ്വകാര്യ പങ്കാളിത്തം വർദ്ധിപ്പിക്കാനുള്ള ഇന്ത്യയുടെ നയത്തിന് ഈ അനുമതി നിർണായകമാണ്.

Elon Musk’s Starlink received final approval from IN-SPACe to launch satellite internet services in India through its subsidiary, Starlink Satellite Communications Pvt Ltd. The Telecom Ministry had earlier granted permission, and with IN-SPACe’s five-year approval, Starlink awaits spectrum allocation to begin operations. The service, using 4,408 LEO satellites, will provide high-speed internet, especially in remote areas. SES, partnering with Jio, also received approval. This aligns with India’s push for private space sector participation.