ദമസ്‌കസ്: സിറിയന്‍ സൈനിക പോസ്റ്റുകളില്‍ ഇസ്‌റാഈല്‍ നടത്തിയ ആക്രമണത്തില്‍ മൂന്നു സൈനികര്‍ കൊല്ലപ്പെടുകയും ഏഴുപേര്‍ക്ക് പരുക്കേല്‍ക്കുകയും ചെയ്തു.
ഞായറാഴ്ച രാവിലെ നടത്തിയ ആക്രമണം ഇസ്‌റാഈല്‍ സൈന്യം ശരിവച്ചു. അതേസമയം, ഇസ്‌റാഈലിലെ ഹെര്‍മന്‍ കുന്നുകളിലേക്ക് സിറിയയില്‍നിന്നും റോക്കറ്റ് ആക്രമണമുണ്ടായതിനു തിരിച്ചടിയാണിതെന്ന് അവര്‍ അറിയിച്ചു.
രണ്ടു റോക്കറ്റുകളിലൊന്ന് ഇസ്‌റാഈലിലാണ് പതിച്ചതെങ്കിലും നാശനഷ്ടമോ ആളപായമോ റിപ്പോര്‍ട്ട് ചെയ്തിട്ടില്ല.
ഇസ്‌റാഈലിന്റെ കൈവശമുള്ള സിറിയയിലെ ഗോലാന്‍ കുന്നുകള്‍ക്കു സമീപമാണ് വ്യോമാക്രമണം നടന്നത്.
സൈനിക പോസ്റ്റുകളെ ലക്ഷ്യംവച്ചുള്ള ആക്രമണത്തില്‍ നാശനഷ്ടമുണ്ടായതായാണ് റിപ്പോര്‍ട്ട്.
ഇറാന്‍ പിന്തുണയുള്ള ഹിസ്ബുല്ലയുടെ ആയുധ ഡിപ്പോക്കു സമീപമാണ് ഇസ്‌റാഈലി ആക്രമണം നടന്നത്.
സിറിയയില്‍ ബഷര്‍ അല്‍ അസദിനെയാണ് ഇറാന്‍ പിന്തുണയ്ക്കുന്നത്. കഴിഞ്ഞയാഴ്ചയും സിറിയയിലെ സൈനിക പോസ്റ്റില്‍ ഇസ്‌റാഈലി വ്യോമാക്രമണം നടന്നിരുന്നു.
ഒരു സൈനികന്‍ കൊല്ലപ്പെടുകയും ചെയ്തു. ബഷര്‍ ഭരണകൂടത്തിന്റെ ആഭ്യന്തരയുദ്ധത്തില്‍ പെട്ട് സിറിയയില്‍ എട്ടുവര്‍ഷത്തിനിടെ 3,70,000 പേരാണ് കൊല്ലപ്പെട്ടത്. ലക്ഷക്കണക്കിനാളുകള്‍ അഭയാര്‍ഥികളായി പോവുകയും ചെയ്തു.